दूध डेअरीचे शटर उचकटून २५ हजारांची रोकड लंपास; जिल्हापेठेत चोरीची घटना

दूध डेअरीचे शटर उचकटून २५ हजारांची रोकड लंपास; जिल्हापेठेत चोरीची घटना

जळगाव (प्रतिनिधी) शहरातील मध्यवर्ती भागात असलेल्या एका दूध डेअरीचे शटर उचकटून अज्ञात चोरट्याने २५ हजार रुपयांची रोकड चोरून नेल्याची घटना उघडकीस आली आहे. या प्रकरणी जिल्हापेठ पोलिस ठाण्यात गुन्हा दाखल करण्यात आला असून, पोलिसांनी तपास सुरू केला आहे.

मिळालेल्या माहितीनुसार, प्रशांत बाळकृष्ण सोनवणे (वय ४७, रा. खान्देश मिल कॉलनी) यांचे शहरातील एका कॉम्प्लेक्समध्ये ‘श्रीपाद मिल्क कॉर्नर’ नावाचे दूध विक्रीचे दुकान आहे. ८ एप्रिल रोजी रात्री सुमारे १० वाजता त्यांनी नेहमीप्रमाणे दुकान बंद केले होते. मात्र, रात्री १० ते दुसऱ्या दिवशी पहाटे ५.३० दरम्यान अज्ञात चोरट्याने दुकानाच्या पत्र्याच्या दरवाजाचा भाग उचकटून आत प्रवेश केला.

दुकानातील टेबलच्या ड्रॉवरमध्ये ठेवलेली सुमारे २५ हजार रुपयांची रोकड चोरट्याने लंपास केली. या रकमेत ५००, २००, १००, ५०, २० आणि १० रुपयांच्या नोटांचा समावेश होता. ९ एप्रिल रोजी सकाळी दुकान उघडल्यानंतर हा प्रकार समोर आला.

या प्रकरणी फिर्यादी प्रशांत सोनवणे यांच्या तक्रारीवरून जिल्हापेठ पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे. पुढील तपास पोलीस हेड कॉन्स्टेबल मिलिंद सोनवणे करीत आहेत.