दोडे गुर्जर समाजातील यशस्वी महिलांचा 31 ऑगस्ट रोजी सन्मान सोहळा
जळगाव: दोडे गुर्जर समाजातील व्यावसायिक आणि नोकरदार महिलांच्या कर्तृत्वाला सलाम करण्यासाठी उत्कर्ष महिला विकास मंडळाने एका विशेष सत्कार समारंभाचे आयोजन केले आहे. येत्या ३१ ऑगस्ट रोजी सकाळी ११ वाजता हा गौरव सोहळा जळगाव शहरातील ख्वाजा मियांजवळील पद्मावती लुंकड कन्या शाळेत पार पडणार आहे.
हा कार्यक्रम महिलांना प्रोत्साहन देण्यासाठी आणि त्यांच्या योगदानाला सन्मानित करण्यासाठी आयोजित करण्यात आला आहे. अनेक वर्षांपासून कौटुंबिक जबाबदाऱ्या सांभाळून व्यवसाय आणि नोकरीमध्ये आपले स्थान निर्माण केलेल्या दोडे गुर्जर समाजातील भगिनींचा यावेळी गौरव केला जाईल.
या कार्यक्रमाचे अध्यक्षस्थान जिल्ह्याचे पालकमंत्री आणि पाणीपुरवठा व स्वच्छता मंत्री नामदार गुलाबराव पाटील भूषवणार आहेत. याशिवाय, मुंबईच्या पेंढारकर कॉलेजच्या प्राध्यापिका मंगला पाटील, पालकमंत्र्यांचे सहाय्यक नवलसिंग राजे पाटील, जिल्हा बँकेच्या संचालिका इंदिरा पाटील, दोडे गुर्जर संस्थानचे अध्यक्ष अभियंता चंद्रशेखर पाटील, सचिव डॉ. राधेश्याम चौधरी, आणि जायंट्स क्लब शहादाच्या अध्यक्षा अधिवक्ता संगीता पाटील हे प्रमुख पाहुणे म्हणून उपस्थित राहणार आहेत.
उत्कर्ष महिला मंडळाच्या अध्यक्षा राजकमल ए. पाटील आणि त्यांच्या सर्व सदस्यांनी प्रसिद्धीपत्रकाद्वारे समाजातील सर्व महिलांना या प्रेरणादायी कार्यक्रमाला उपस्थित राहण्याचे आवाहन केले आहे. हा सोहळा समाजातील महिलांसाठी एक नवीन ऊर्जा देणारा ठरेल अशी अपेक्षा आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
