धक्कादायक घटना : आठ महिन्यांच्या गर्भवती पत्नीची पतीकडून गळा दाबून हत्या; रावेर तालुक्यात खळबळ

धक्कादायक घटना : आठ महिन्यांच्या गर्भवती पत्नीची पतीकडून गळा दाबून हत्या; रावेर तालुक्यात खळबळ

रावेर (प्रतिनिधी) : शरीरसुखाच्या मागणीला नकार दिल्याच्या रागातून एका पतीने आपल्या आठ महिन्यांच्या गर्भवती पत्नीची गळा दाबून निर्घृण हत्या केल्याची धक्कादायक घटना रावेर तालुक्यातील निमड्या (सायबूपाडा) परिसरात उघडकीस आली आहे. या प्रकरणी रावेर पोलीस ठाण्यात खुनाचा गुन्हा दाखल करण्यात आला असून आरोपी पतीला अटक करण्यात आली आहे.

मृत महिलेचे नाव ललू शरद पावरा (वय २५, रा. निमड्या, ता. रावेर) असे आहे. ही घटना ४ एप्रिल रोजी सायंकाळी ३ ते ५ वाजेच्या सुमारास घडल्याचे समोर आले आहे. आरोपी पती शरद मिरलाल पावरा याने राहत्या घराच्या मागील बाजूस असलेल्या जंगलात पत्नीला नेऊन शरीरसंबंधाची मागणी केली.

मात्र, आठ महिन्यांची गर्भवती असल्याने महिलेने नकार दिला. या नकाराचा राग आल्याने आरोपीने तिला जमिनीवर पाडून हात-पाय दाबले, छातीवर बसून दोन्ही हातांनी गळा आवळून तिची हत्या केली. एवढ्यावरच न थांबता तिच्या अंगावरील शर्टचा वापर करून गळा आवळत तो शर्ट झाडाला बांधून आरोपी घटनास्थळावरून फरार झाला.

या घटनेनंतर पोलीस पाटील रमजान अहमद तडवी (वय ३७, रा. अंधारमळी) यांनी दिलेल्या फिर्यादीवरून रावेर पोलीस ठाण्यात खुनाचा गुन्हा दाखल करण्यात आला आहे.

घटनेची माहिती मिळताच उपविभागीय पोलीस अधिकारी (फैजपूर विभाग) अनिल बडगुजर, तसेच पोलीस निरीक्षक डॉ. विशाल जयस्वाल यांनी घटनास्थळी भेट देऊन पाहणी केली. तपासादरम्यान पोलिसांनी तातडीने कारवाई करत आरोपी पतीला १३ एप्रिल रोजी मध्यरात्री अटक केली.

या प्रकरणाचा पुढील तपास पोलीस उपनिरीक्षक मनोज महाजन करत आहेत. या क्रूर घटनेमुळे संपूर्ण रावेर तालुक्यात संतापाची लाट उसळली आहे.