धक्कादायक! पोलीस वसाहतीत कुजलेला मृतदेह; उग्र वासामुळे प्रकरण उघड

धक्कादायक! पोलीस वसाहतीत कुजलेला मृतदेह; उग्र वासामुळे प्रकरण उघड

ओळख पटविण्यासाठी पोलिसांची धडपड; सुरक्षेचा प्रश्न ऐरणीवर

जळगाव : जिल्हापेठ पोलीस ठाण्याच्या शेजारील पोलीस वसाहतीच्या आवारात सुरक्षा भिंतीलगत कुजलेल्या अवस्थेत एका पुरुषाचा मृतदेह आढळून आल्याने शहरात खळबळ उडाली आहे. रविवारी दुपारी सुमारास परिसरात प्रचंड उग्र वास येऊ लागल्याने हा प्रकार उघडकीस आला.

सदर परिसरात बांधकाम सुरू असल्याने सुरुवातीला वासाकडे दुर्लक्ष करण्यात आले.

मात्र वास तीव्र होत गेल्याने समोरील रुग्णालयातील कर्मचाऱ्यांनी महापालिकेकडे तक्रार केली. त्यानुसार आरोग्य विभागाचे पथक घटनास्थळी दाखल झाले. त्यानंतर भिंतीलगत शोध घेत असताना कुजलेल्या अवस्थेतील मृतदेह आढळून आला.

प्राथमिक तपासात मृत इसमाचे वय अंदाजे ४० ते ४५ वर्षे असून तो भिकारी असल्याचा अंदाज पोलिसांनी व्यक्त केला आहे. मृतदेहावरील टी-शर्ट, काळी पॅन्ट आणि उजव्या हातावरील दोरा यावरून ओळख पटविण्याचा प्रयत्न सुरू आहे. चेहरा पूर्णतः कुजलेला असल्याने ओळख पटविण्यात अडचणी येत असून सुमारे १० ते १५ दिवसांपूर्वी मृत्यू झाला असावा, असा अंदाज व्यक्त करण्यात येत आहे.