धक्कादायक : लग्नाचे आमिष दाखवून १६ वर्षीय अल्पवयीन मुलीवर अत्याचार; पीडितेने दिला बाळाला जन्म

धक्कादायक : लग्नाचे आमिष दाखवून १६ वर्षीय अल्पवयीन मुलीवर अत्याचार; पीडितेने दिला बाळाला जन्म

​चोपडा तालुक्यातील संतापजनक घटना 

​चोपडा (प्रतिनिधी) : चोपडा तालुक्यातील  एका परिसरातून एक अत्यंत हृदयद्रावक आणि धक्कादायक घटना समोर आली आहे. एका १६ वर्षीय अल्पवयीन मुलीला लग्नाचे आमिष दाखवून तिच्यावर अत्याचार केल्याची घटना घडली असून, या अत्याचारामुळे पीडित मुलगी गर्भवती राहिली आणि तिने एका बाळाला जन्म दिला आहे. याप्रकरणी चोपडा ग्रामीण पोलीस ठाण्यात आरोपीविरुद्ध गंभीर कलमान्वये गुन्हा दाखल करण्यात आला असून संपूर्ण परिसरात खळबळ उडाली आहे.

​ मिळालेल्या माहितीनुसार, या प्रकरणातील संशयित आरोपी दीपक प्रकाश भिल (रा. , ता. चोपडा) याची पीडित मुलीशी दोन वर्षांपूर्वी ओळख झाली होती. ओळखीचा फायदा घेत आरोपीने पीडितेशी जवळीक साधली आणि तिला लग्नाचे आमिष दाखवले. सुमारे दीड वर्षांपूर्वी, संशयित आरोपीने पीडितेचे तिच्या पालकांच्या ताब्यातून अपहरण करून तिला नाल्याजवळ नेले. तिथे तिच्या असहायतेचा फायदा घेत तिच्यावर बळजबरीने शारीरिक संबंध प्रस्थापित केले.

​अत्याचारातून गर्भधारणा अन् प्रसूती या अत्याचारामुळे पीडित मुलगी गर्भवती राहिली. जेव्हा ती पाच महिन्यांची गर्भवती होती, तेव्हा तिने ही बाब आरोपी दीपकला सांगितली. मात्र, आरोपीने तिला आधार देण्याऐवजी आपली जबाबदारी झटकून टाकली. पीडितेची कौटुंबिक आणि सामाजिक परिस्थिती हलाखीची असल्याने तिने हे दुःख सहन केले.

अखेर, मंगळवारी दि. २४ फेब्रुवारी २०२६ रोजी पीडित अल्पवयीन मुलीने आपल्या राहत्या घरीच एका गोंडस मुलाला जन्म दिला. हा प्रकार उघडकीस आल्यानंतर परिसरात एकच चर्चा सुरू झाली असून नागरिकांमधून संताप व्यक्त केला जात आहे.

​पोलीस कारवाई व तपास या घटनेची गंभीर दखल प्रशासनाने घेतली आहे. महिला पोलीस उपनिरीक्षक कविता ठाणगे (नेमणूक अमळनेर पोलीस स्टेशन) यांनी पीडितेचा सविस्तर जबाब नोंदवून घेतला. या जबाबाच्या आधारे चोपडा ग्रामीण पोलीस ठाण्यात आरोपी दीपक भिल याच्याविरुद्ध पोक्सो व इतर कलमान्वये गुन्हा दाखल करण्यात आला आहे. या प्रकरणाचा पुढील तपास चोपडा ग्रामीण पोलीस स्टेशनचे सपोनि शेषराव नितनवरे करत आहेत. सध्या आरोपी फरार असून पोलीस त्याचा कसून शोध घेत आहेत.