धावत्या रेल्वेचा धक्का लागून प्रौढ जागीच ठार

धावत्या रेल्वेचा धक्का लागून प्रौढ जागीच ठार

जळगाव प्रतिनिधी

जळगाव तालुक्यातील डोमगाव फाट्याजवळ धावत्या रेल्वेचा धक्का लागून म्हसावद येथील एका प्रौढाचा जागीच मृत्यू झाल्याची दुर्दैवी घटना गुरुवारी (दि. १६) रात्री आठ वाजेच्या सुमारास घडली. या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे.

मृताचे नाव लक्ष्मण काळू धोत्रे (वय ४९, रा. म्हसावद, ता. जळगाव) असे असून ते दगडातून पाटा व वरवंटा बनविण्याचे काम करून कुटुंबाचा उदरनिर्वाह करत होते.

मिळालेल्या माहितीनुसार, लक्ष्मण धोत्रे हे पत्नी व तीन मुलांसह म्हसावद येथे वास्तव्यास होते. गुरुवारी रात्री ते काहीही न सांगता घरातून बाहेर पडले. त्यानंतर रात्री आठ वाजेच्या सुमारास ते डोमगाव फाट्याजवळील रेल्वे रुळावरून जात असताना धावत्या रेल्वेचा धक्का बसून त्यांचा जागीच मृत्यू झाला.

घटनेची माहिती मिळताच एमआयडीसी पोलिस ठाण्याचे कर्मचारी तसेच रेल्वे पोलीस घटनास्थळी दाखल झाले. त्यांनी पंचनामा करून मृतदेह शासकीय वैद्यकीय महाविद्यालय, जळगाव येथे पाठविला.

या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली असून, पुढील तपास पोलिस कर्मचारी करत आहेत.या घटनेमुळे म्हसावद व परिसरात हळहळ व्यक्त होत आहे.