धुलिवंदनाच्या दिवशी मेहरूणमध्ये दोन गटांत हाणामारी; दोघे जखमी
साईबाबा मंदिर चौकात जुन्या वादातून तणाव; परिस्थिती नियंत्रणात
जळगाव (प्रतिनिधी) – शहरातील मेहरूण परिसरात धुलिवंदनाच्या दिवशी दोन गटांमध्ये तुफान हाणामारी झाल्याची घटना घडली. साईबाबा मंदिर चौकात जुन्या वादाच्या पार्श्वभूमीवर हा प्रकार घडला असून त्यानंतर परिसरात काही काळ तणावाचे वातावरण निर्माण झाले. या घटनेत दोघेजण जखमी झाले असून त्यापैकी भाजपाचे नगरसेवक सुनील महाजन यांचे बंधू भरत महाजन यांना गंभीर दुखापत झाल्याने रुग्णालयात दाखल करण्यात आले आहे.
मेहरूणमधील साईबाबा मंदिर चौक येथे धुलिवंदन साजरे करत असताना जुन्या वादातून दोन गट आमनेसामने आले. सुरुवातीला झालेल्या शाब्दिक वादाचे रूपांतर हाणामारीत झाले. त्यानंतर किरकोळ दगडफेक झाल्याचेही सांगितले जात आहे. या प्रकारात एका घराच्या गेटची तोडफोड करण्यात आल्याची माहिती समोर आली आहे.
घटनेची माहिती मिळताच एमआयडीसी पोलिस ठाणे येथील पोलिसांनी घटनास्थळी तात्काळ धाव घेत जमावाला पांगविले. परिस्थितीचे गांभीर्य लक्षात घेता पोलिसांनी अतिरिक्त बंदोबस्त तैनात केला. एमआयडीसी पोलिस ठाण्याबाहेर दोन्ही गटातील नागरिकांची गर्दी झाल्याने दंगा नियंत्रण पथकही सज्ज ठेवण्यात आले होते.
दरम्यान, पोलिसांच्या प्राथमिक माहितीनुसार मोठ्या प्रमाणात दगडफेक झालेली नसून जुन्या वादातून किरकोळ स्वरूपाचा वाद झाला. या वादात दोन जण जखमी झाले असून भरत महाजन यांना उपचारासाठी रुग्णालयात दाखल करण्यात आले आहे. सध्या परिस्थिती पूर्णपणे नियंत्रणात असल्याची माहिती पोलिसांनी दिली असून, दोन्ही गटांच्या तक्रारीवरून गुन्हा नोंदविण्याची प्रक्रिया रात्री उशिरापर्यंत सुरू होती.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
