नराधम शिक्षकाचा तीन वर्षांपासून विद्यार्थिनीवर अत्याचार

नराधम शिक्षकाचा तीन वर्षांपासून विद्यार्थिनीवर अत्याचार

​फोटो व्हायरल करण्याची धमकी देऊन नराधमाचे कृत्य
​धरणगाव:  विद्यार्थिनीला अश्लील व्हिडिओ पाठवून आणि फोटो व्हायरल करण्याची धमकी देऊन गेल्या तीन वर्षांपासून लैंगिक अत्याचार करणाऱ्या एका नराधम शिक्षकाचा प्रताप उघडकीस आला आहे. या धक्कादायक प्रकारामुळे शैक्षणिक वर्तुळात प्रचंड संताप व्यक्त होत असून, धरणगाव पोलिसांनी संशयित शिक्षक राहुल जगन्नाथ अहिरे (रा. अमळनेर) याला अटक केली आहे. न्यायालयाने त्याला दोन दिवसांची पोलीस कोठडी सुनावली आहे.

​२०२२ पासून सुरू होता छळ
​पीडित मुलगी २०२२ मध्ये धरणगाव येथील एका शाळेत शिकत असताना संशयित राहुल अहिरे तेथे शिक्षक होता. पीडितेच्या वर्गाशी संबंध नसतानाही तो तिला अश्लील इशारे करून अंगलट येण्याचा प्रयत्न करायचा. वाच्यता केल्यास कुटुंबीयांना आणि भावाला जीवे मारण्याची धमकी तो देत होता. तो पीडितेचा पाठलाग करत तिच्या घरापर्यंतही पोहोचला होता.

​एकदा संशयित आरोपी पीडितेच्या घरात शिरला असता, तिच्या आईने त्याला पाहिले. पकडले जाण्याच्या भीतीने त्याने खिडकीतून उडी मारली, ज्यात त्याच्या पायाला दुखापत झाली होती. त्यावेळी त्याला मारहाणही झाली होती, मात्र त्याने माफी मागितल्यामुळे प्रकरण मिटवण्यात आले होते. परंतु, नराधमाची वृत्ती सुधारली नाही

.
​शाळा सोडल्यानंतरही अत्याचार सुरूच

​पीडितेने शाळा सोडल्यानंतरही राहुल अहिरे तिला त्रास देत होता. सप्टेंबर २०२५ मध्ये तो तिला आपल्या घरी घेऊन गेला आणि तिथे तिच्यावर लैंगिक अत्याचार केले. संशयिताने पीडितेचे गुपचूप फोटो काढले होते, ते व्हायरल करण्याची धमकी देऊन तो वारंवार शरीरसुखाची मागणी करत असे. या त्रासामुळे पीडिता गंभीर नैराश्यात गेली होती.

​नैराश्यात असलेल्या पीडितेवर उपचार सुरू असताना तिला विश्वासात घेतले असता, तिने हा सर्व भीषण प्रकार कथन केला. बरे वाटल्यानंतर पीडितेच्या आईने ७ एप्रिल रोजी धरणगाव पोलिसात धाव घेतली.

​पोक्सोअंतर्गत गुन्हा दाखल

​पोलिसांनी संशयित राहुल अहिरे विरुद्ध पोक्सो (POCSO) आणि अन्य कलमान्वये गुन्हा दाखल करून त्याला तातडीने अटक केली आहे. या प्रकरणाचा पुढील तपास पोलीस करत आहेत.