नागाई–जोगाई मंदिरात मध्यरात्री चोरी; दागिनेसह दानपेटी फोडली
सीसीटीव्हीत कैद घटना; तालुका पोलीस ठाण्यात अज्ञातांविरुद्ध गुन्हा
जळगाव : शहरालगतच्या नागझिरी शिवारातील गिरणा नदीकाठी वसलेल्या नागाई-जोगाई मंदिरात चोरट्यांनी मध्यरात्री डल्ला मारत देवतांचे दागिने आणि दानपेटीतील सुमारे साडेनऊ हजार रुपयांची रोकड लंपास केली. मंदिराच्या दरवाजाचे कुलूप तोडून ही चोरी करण्यात आली असून संपूर्ण घटना सीसीटीव्ही कॅमेऱ्यात कैद झाली आहे. प्रकरणी जळगाव तालुका पोलीस ठाणे येथे गुन्हा दाखल करण्यात आला आहे.
दि. १७ फेब्रुवारी रोजी रात्री सुमारे ८ वाजेच्या सुमारास दोन अज्ञात व्यक्तींनी मंदिराच्या मागील बाजूच्या लोखंडी चॅनल गेटचे कुलूप तोडून आत प्रवेश केला. त्यानंतर महादेवाच्या पिंडीवरील चांदीचे छत्र काढून नेले तसेच दानपेटी फोडून त्यातील रोख रक्कम चोरून नेली. ही संपूर्ण हालचाल मंदिर परिसरातील सीसीटीव्हीमध्ये स्पष्टपणे दिसून येत असून फुटेज पोलिसांनी ताब्यात घेतले आहे.
या प्रकरणी मंदिराचे विश्वस्त दिनेश सोनवणे यांनी तालुका पोलीस ठाण्यात फिर्याद दिली आहे. अज्ञात दोन चोरट्यांविरुद्ध गुन्हा दाखल करण्यात आला असून पुढील तपास पोलीस कॉन्स्टेबल रामकृष्ण इंगळे करीत आहेत. चोरीमुळे परिसरात अस्वस्थता निर्माण झाली असून पोलिसांनी संशयितांचा शोध सुरू केला आहे.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
