नामांकित ट्रान्सपोर्ट कंपनीचा विश्वासघात; कंटेनर चालकाकडून टायर-ट्यूबचा अपहार

नामांकित ट्रान्सपोर्ट कंपनीचा विश्वासघात; कंटेनर चालकाकडून टायर-ट्यूबचा अपहार

घोडसगावजवळ कंटेनर टाकून चालक फरार; सुमारे २ लाख ७ हजारांचा माल गायब

मुक्ताईनगर (प्रतिनिधी): नामांकित ट्रान्सपोर्ट कंपनीच्या कंटेनर चालकानेच कंपनीचा विश्वासघात करत लाखोंच्या मालावर डल्ला मारल्याची खळबळजनक घटना समोर आली आहे. चेन्नईहून इंदूरकडे जाणाऱ्या कंटेनरमधून सुमारे २ लाख ७ हजार ४० रुपये किमतीचे टायर, फ्लॅप व ट्यूब परस्पर काढून घेऊन चालक फरार झाल्याचा प्रकार मुक्ताईनगर तालुक्यातील घोडसगावजवळ उघडकीस आला असून, याप्रकरणी मुक्ताईनगर पोलीस ठाण्यात गुन्हा दाखल करण्यात आला आहे.

‘संधु लॉजिस्टिक इंडिया प्रा. लि.’ या कंपनीचे डेप्युटी मॅनेजर अक्षीत विनयकुमार पांडे (रा. नवी दिल्ली) यांनी दिलेल्या फिर्यादीनुसार, कंपनीचा कंटेनर (क्र. NL 01 AG 8685) अपोलो कंपनीचे ३९९ टायर, फ्लॅप व ट्यूब असा तब्बल ६९ लाख ९९ हजार ९९७ रुपये किमतीचा माल घेऊन चेन्नई येथून इंदूरकडे रवाना झाला होता. हा कंटेनर चालक अमितसिंग विरंदरसिंग (रा. उत्तर प्रदेश) याच्या ताब्यात देण्यात आला होता.

प्रवासादरम्यान आर्थिक फायद्यासाठी आरोपी चालकाने कंटेनरमधील मालावर हात साफ केल्याचे तपासात स्पष्ट झाले आहे. त्याने १४ ट्रक टायर (१,९१,३६० रुपये), १४ फ्लॅप (११,४९४ रुपये) व १४ ट्यूब (४,१८६ रुपये) असा एकूण २ लाख ७ हजार ४० रुपयांचा माल परस्पर काढून त्याची विल्हेवाट लावली. त्यानंतर कंटेनर घोडसगाव येथील ‘बाबा रामदेव ढाब्या’च्या आवारात उभा करून आरोपी चालक फरार झाला.

कंटेनर नियोजित वेळेत इंदूरला न पोहोचल्याने व चालकाशी संपर्क न झाल्याने कंपनीने शोधमोहीम राबवली. त्यावेळी कंटेनर बेवारस अवस्थेत आढळून आला. तपासणीदरम्यान कंटेनरमधील काही माल गायब असल्याचे निदर्शनास आले. या प्रकरणी पोलीस निरीक्षक आशिष आडसूळ यांच्या मार्गदर्शनाखाली मुक्ताईनगर पोलीस ठाण्यात गुन्हा नोंदवण्यात आला असून, पुढील तपास पोलीस हेड कॉन्स्टेबल अजय खंडेराव करत आहेत.