ना. गिरिश महाजन यांनी मुख्यमंत्री सहाय्य्यता निधीला दिला वर्षभराचा पगार

ना. गिरिश महाजन यांनी मुख्यमंत्री सहाय्य्यता निधीला दिला वर्षभराचा पगार

मुंबई (प्रतिनिधी), राज्यातील मुसळधार पावसामुळे शेतीचे मोठे नुकसान आणि विविध भागांत महापुरामुळे उद्भवलेल्या संकटात नागरिकांच्या मदतीसाठी जलसंपदा व आपत्ती व्यवस्थापन मंत्री गिरीश महाजन यांनी उल्लेखनीय पाऊल उचलले आहे. त्यांनी मंत्री पदाच्या वर्षभरातील संपूर्ण वेतन रक्कम रुपये ३१ लाख १८ हजार २८६ मुख्यमंत्री सहाय्यता निधीत दान केली असून, त्याबाबतचा धनादेश आणि संमतीपत्र मंत्रीमंडळाच्या बैठगीदरम्यान मुख्यमंत्री देवेंद्र फडणवीस यांच्याकडे सादर केले. वर्षभराचा पगार दान करणारे ते राज्यातील पहिले मंत्री ठरले आहेत.

मराठवाड्यातील जालना, बीड, छत्रपती संभाजीनगर, धाराशिव, सोलापूर तर उत्तर महाराष्ट्रातील जळगाव, नाशिक या जिल्ह्यांत मुसळधार पावसाने आणि महापुराने प्रचंड नुकसान झाले आहे. संकटकाळात प्रत्यक्ष भेटी घेऊन नुकसानग्रस्त भागाची पाहणी करणारे महाजन हे ‘संकटमोचक’ म्हणून ओळखले जातात. यापूर्वीही पूर, दुष्काळ, आगीसारख्या नैसर्गिक आपत्तींमध्ये ते प्रभावी भूमिका बजावत आहेत. या निधीद्वारे शेतकऱ्यांना आणि आपत्तीग्रस्तांना अर्थसहाय्य मिळेल, अशी अपेक्षा आहे.

मंत्री गिरीश महाजन यांनी सांगितले, “राज्याच्या जनतेच्या आणि शेतकऱ्यांच्या पाठीशी शासन खंबीर आहे. शासनाकडून त्यांना योग्य ती मदत मिळत असताना, आपल्या स्तरावरही सहभाग असावा म्हणून मी सध्याच्या मंत्री पदाच्या शपथेपासून (डिसेंबर २०२४ ते नोव्हेंबर २०२५) वर्षभराचे एकूण वेतन रुपये ३१ लाख १८ हजार २८६ मा. मुख्यमंत्री सहाय्यता निधीत देत आहे.” ही रक्कम डिसेंबर २०२४ ते नोव्हेंबर २०२५ या कालावधीची आहे.

महायुती सरकारच्या आमदार-खासदारांनी एक महिन्याचा पगार दान करण्याची घोषणा केली असली, तरी महाजन यांचे हे दान वर्षभराचे असल्याने ते विशेष ठरते. यापूर्वी अनेक सेवाभावी संस्था आणि लोकप्रतिनिधींनी या निधीत योगदान दिले असले, तरी वर्षभराचा पगार दान करणारे महाजन हे पहिले मंत्री आहेत. मुख्यमंत्री सहाय्यता निधी ही पूर, दुष्काळ, आगीसारख्या आपत्तींमधील बाधितांना मदत करण्यासाठी वापरला जाणारा निधी असून, यातून शेतकऱ्यांना आणि नागरिकांना तात्काळ अर्थसहाय्य मिळते.