निंभोरा सबस्टेशनचा जळालेला ट्रान्सफॉर्मर तातडीने बदलणार; आमदार अमोल जावळे यांच्या पाठपुराव्याला यश

निंभोरा सबस्टेशनचा जळालेला ट्रान्सफॉर्मर तातडीने बदलणार; आमदार अमोल जावळे यांच्या पाठपुराव्याला यश

​ओझर येथून नवीन ट्रान्सफॉर्मर रवाना; निंभोरा, वडगाव, खिर्डीसह अनेक गावांमधील वीज संकटावर मात

​रावेर | प्रतिनिधी
रावेर तालुक्यातील निंभोरा येथील १३२ केव्ही सबस्टेशनमधील २५ एमव्हीए क्षमतेचा मुख्य ट्रान्सफॉर्मर अचानक जळाल्यामुळे निर्माण झालेले वीज संकट आता दूर होणार आहे. या तांत्रिक बिघाडामुळे परिसरातील अनेक गावांमधील शेती पंप आणि गावठाणचा वीजपुरवठा पूर्णपणे खंडित झाला होता. मात्र, आमदार अमोल जावळे यांनी या प्रकरणी तातडीने लक्ष घालून वरिष्ठ पातळीवर केलेल्या प्रभावी पाठपुराव्यामुळे अवघ्या काही तासांत नवीन ट्रान्सफॉर्मर उपलब्ध झाला असून, तो निंभोराकडे रवाना झाला आहे.
​निंभोरा सबस्टेशनमधील ट्रान्सफॉर्मर जळाल्यामुळे निंभोरा गावठाण, वडगाव गावठाण, खिर्डी, विवरा, बलवाडी, आंदलवाडी आणि सिंगत परिसरातील शेती पंपांचे ११ केव्ही फिडर तसेच घरगुती वीजवाहिन्या ठप्प झाल्या होत्या. ऐन हंगामात शेतीचा वीजपुरवठा खंडित झाल्याने पिकांना पाणी कसे द्यावे, असा गंभीर प्रश्न शेतकऱ्यांसमोर उभा ठाकला होता. ही परिस्थिती लक्षात घेऊन स्थानिक शेतकरी आणि ग्रामस्थांनी आमदार अमोल जावळे यांच्याकडे मदतीची मागणी केली. आमदारांनी घटनेचे गांभीर्य ओळखून तात्काळ १३२ केव्ही ट्रान्समिशन कंपनीच्या वरिष्ठ अधिकाऱ्यांशी संपर्क साधला आणि नवीन ट्रान्सफॉर्मर युद्धपातळीवर उपलब्ध करून देण्याच्या सूचना दिल्या.
​आमदार जावळे यांच्या आक्रमक पाठपुराव्याला यश आले असून, नाशिक जवळील ओझर येथून २५ एमव्हीए क्षमतेचा नवीन ट्रान्सफॉर्मर उचलण्यात आला आहे. हा ट्रान्सफॉर्मर आज रात्रीच निंभोराकडे रवाना झाला असून, तो उद्या दुपारपर्यंत सबस्टेशनमध्ये दाखल होईल, अशी माहिती संबंधित विभागाकडून देण्यात आली आहे. नवीन ट्रान्सफॉर्मर बसवून तो कार्यान्वित झाल्यानंतर परिसरातील शेती आणि घरांचा वीजपुरवठा पुन्हा सुरळीत होईल. प्रशासनाने दाखवलेली ही तत्परता आणि आमदारांनी केलेल्या यशस्वी पाठपुराव्याबद्दल निंभोरा परिसरातील शेतकरी व नागरिकांनी समाधान व्यक्त करत आमदार अमोल जावळे यांचे आभार मानले आहेत.