नैसर्गिक मृत्यूला अपघाताचा बनाव; ५० लाखांचा विमा लाटण्याचा प्रयत्न उघड

नैसर्गिक मृत्यूला अपघाताचा बनाव; ५० लाखांचा विमा लाटण्याचा प्रयत्न उघड

चाळीसगाव ग्रामीण रुग्णालयाचे वैद्यकीय अधिकारी, चार पोलिसांसह आठ जण अटकेत; मेहुणबारे पोलिसांची धडक कारवाई

चाळीसगाव (प्रतिनिधी) : नैसर्गिक मृत्यूला अपघाताचा रंग देत तब्बल ५० लाख रुपयांचा विमा मिळवण्याचा प्रयत्न केल्याचा धक्कादायक प्रकार उघडकीस आला असून या प्रकरणात चाळीसगाव ग्रामीण रुग्णालयातील वैद्यकीय अधिकारी, पोलिस कर्मचारी तसेच मृताच्या कुटुंबीयांसह आठ जणांना अटक करण्यात आली आहे. मेहुणबारे पोलिसांनी सोमवारी सकाळी ही धडक कारवाई केली.

वैद्यकीय अधिकारी व पोलिस कर्मचाऱ्यांचा सहभाग
या प्रकरणात अटक करण्यात आलेल्यांमध्ये चाळीसगाव ग्रामीण रुग्णालयाचे वैद्यकीय अधिकारी डॉ. मंदार करंबळेकर, मेहुणबारे पोलिस ठाण्यातील कर्मचारी महेंद्र पाटील, रवींद्र बत्तीशे, सचिन निकम, सुनील निकम, तसेच मृताची पत्नी अरुणा जाधव, भाऊ मिथुन जाधव आणि विमा प्रतिनिधी प्रवीण पाटील यांचा समावेश आहे. या सर्वांविरुद्ध गुन्हा दाखल करून पुढील तपास सुरू करण्यात आला आहे.

अपघाताचा खोटा बनाव
मालेगाव येथील राजेंद्र जालंदर जाधव यांचा १९ एप्रिल २०२५ रोजी दहिवद फाट्यावर कारने धडक दिल्याने मृत्यू झाल्याची तक्रार मेहुणबारे पोलिस ठाण्यात नोंदविण्यात आली होती. अपघातानंतर त्यांना चाळीसगाव ग्रामीण रुग्णालयात आणण्यात आले आणि तेथे त्यांचा मृत्यू झाल्याचे दाखविण्यात आले होते.

५० लाखांच्या विम्यासाठी दावा
मृताचे वारसदार म्हणून पत्नी अरुणा जाधव यांनी ३ मे २०२५ रोजी एका खासगी विमा कंपनीकडे ५० लाख रुपयांच्या विम्याचा दावा दाखल केला होता. मात्र विमा कंपनीकडून करण्यात आलेल्या चौकशीत या प्रकरणातील संशयास्पद बाबी समोर आल्या.

चौकशीत उघड झाला धक्कादायक प्रकार
विमा कंपनीच्या तपासात राजेंद्र जाधव यांचा मृत्यू प्रत्यक्षात २३ फेब्रुवारी २०२४ रोजी यकृताच्या आजाराने झाल्याचे स्पष्ट झाले. त्यांच्या घरातील फोटोवरही हीच मृत्यूची तारीख नमूद असल्याचे आढळून आले. त्यामुळे अपघाताची नोंद बनावट असल्याचे उघड झाले.

दहा विमा पॉलिसींचाही तपास
दरम्यान, या प्रकरणात आणखी एक धक्कादायक बाब समोर आली आहे. मृताच्या नावावर विविध कंपन्यांकडून सुमारे दहा विमा पॉलिसी काढण्यात आल्याचे आणि त्यावरही दावे करण्याचा प्रयत्न झाल्याची माहिती तपासात पुढे आली आहे. या संपूर्ण प्रकरणाचा पुढील तपास मेहुणबारे पोलिसांकडून सुरू आहे.