न्यायालयीन कामासाठी आलेल्या तरुणाचा खून; जळगाव हादरले

न्यायालयीन कामासाठी आलेल्या तरुणाचा खून; जळगाव हादरले

केस मागे न घेतल्याने चॉपरने हल्ला

जळगाव : प्रतिनिधी
जळगाव शहरातील जैनाबाद येथील नितीन नाना काळे (वय ३५) या तरुणाचा जुन्या वादातून चॉपरने वार करून निर्घृण खून केल्याची धक्कादायक घटना समोर आली आहे. न्यायालयीन कामकाजासाठी जळगावात आलेल्या नितीनवर हल्ला करण्यात आला असून, उपचारादरम्यान सोमवारी (दि. २३) सकाळी त्याचा मृत्यू झाला.

केस मागे घेण्याचा दबाव; नकार दिल्याने हल्ला

संशयित श्याम तुकाराम सूर्यवंशी (रा. दिनकर नगर) याने जुना गुन्हा मागे घेण्याचा दबाव टाकत नितीनला घरातून सोबत नेले. मात्र, नितीनने नकार दिल्यानंतर त्याच्यावर धारदार चॉपरने पोटात वार करत जीवेठार मारण्याचा प्रयत्न करण्यात आला.
रक्तबंबाळ अवस्थेत सापडला; रुग्णालयात मृत्यू
हल्ल्यानंतर नितीन गंभीर जखमी अवस्थेत संशयिताच्या घराजवळ आढळून आला. मित्राच्या मदतीने त्याला तातडीने शासकीय वैद्यकीय महाविद्यालयात दाखल करण्यात आले; मात्र, उपचारादरम्यान त्याने अखेरचा श्वास घेतला.

“आई, मी आता वाचणार नाही…” शेवटचे शब्द
उपचार सुरू असताना नितीनने आईशी बोलताना “मी आता वाचणार नाही” असे सांगितल्याची माहिती समोर आली असून, या घटनेने परिसरात हळहळ व्यक्त होत आहे.

नातेवाईकांचा संताप; पोलिसांवर आरोपांची सरबत्ती
घटनेनंतर संतप्त नातेवाईकांनी शनिपेठ पोलिसांवर गंभीर आरोप करत संशयिताविरोधात पूर्वी अनेक गुन्हे दाखल असूनही कारवाई करण्यात आली नसल्याचे म्हटले. “अधिकाऱ्यांनी वेळेत कारवाई केली असती तर आज ही घटना घडली नसती,” असा आरोप त्यांनी केला.
संशयितावर पूर्वीचे गुन्हे; हद्दपारी प्रस्तावही रद्द
श्याम सूर्यवंशी याच्यावर यापूर्वीही गंभीर गुन्हे दाखल असून, त्याच्या हद्दपारीचा प्रस्तावही देण्यात आला होता. मात्र, तो प्रस्ताव रद्द करण्यात आल्याची माहिती समोर आली आहे.
न्यायालयीन कामकाजापूर्वीच घडली घटना
नितीन काळे हा गोवा येथून न्यायालयीन कामासाठी जळगावात आला होता. संबंधित प्रकरणाची तारीख असताना त्यापूर्वीच त्याच्यावर हल्ला करण्यात आल्याने या घटनेला वेगळेच गांभीर्य प्राप्त झाले आहे.

पाच वर्षांच्या चिमुकल्याचे पितृछत्र हरपले
मृत नितीनच्या पश्चात आई-वडील, पत्नी, भाऊ आणि पाच वर्षांचा मुलगा असा परिवार आहे. या घटनेमुळे कुटुंबावर दु:खाचा डोंगर कोसळला असून, परिसरात शोककळा पसरली आहे.
संशयिताला अटक; सात दिवसांची कोठडी
या प्रकरणी पोलिसांनी संशयित श्याम सूर्यवंशी याला अटक केली असून, न्यायालयाने त्याला सात दिवसांची पोलीस कोठडी सुनावली आहे. पुढील तपास सुरू आहे.