पहिल्याच महासभेत महापालिकेत खडाजंगी; कचरा संकलनातील भ्रष्टाचारावर जोरदार आरोप

पहिल्याच महासभेत महापालिकेत खडाजंगी; कचरा संकलनातील भ्रष्टाचारावर जोरदार आरोप

आरोग्य, पाणी व स्वच्छतेच्या प्रश्नांवरून प्रशासन धारेवर; दोषींवर गुन्हे दाखल करण्याचे आदेश

जळगाव : महापालिका निवडणुकीनंतर सोमवारी (दि. ३०) पार पडलेली पहिलीच महासभा प्रचंड वादळी ठरली. आरोग्य, स्वच्छता, कचरा संकलन आणि पाणीपुरवठा या मूलभूत प्रश्नांवरून सत्ताधारी नगरसेवकांनी प्रशासनाला चांगलेच धारेवर धरत तीव्र नाराजी व्यक्त केली. विशेषतः कचरा संकलनातील कथित भ्रष्टाचार आणि अधिकाऱ्यांच्या निष्क्रियतेवर जोरदार टीका करण्यात आली.

व्यासपीठावर मान्यवरांची उपस्थिती
सभेला महापौर दीपमाला काळे, उपमहापौर मनोज चौधरी, आयुक्त ज्ञानेश्वर ढेरे आणि नगरसचिव सतीश शुक्ला उपस्थित होते. प्रारंभीच भाजपचे ज्येष्ठ नेते नितीन लढ्ढा, नितीन बरडे आणि माजी महापौर विष्णू भंगाळे यांनी प्रशासकीय काळात रखडलेल्या कामांचा पाढा वाचत प्रशासनाला जाब विचारला.

कचरा संकलनात ‘मातीचा खेळ’ उघड?

सभेतील सर्वाधिक गाजलेला मुद्दा कचरा संकलनाचा ठरला. शहरातील कचरा उचलणाऱ्या ‘बीव्हीजी’ या मक्तेदाराकडून ट्रॅक्टरमध्ये कचऱ्याऐवजी माती भरून वजन वाढवले जात असल्याचा गंभीर आरोप करण्यात आला. नगरसेवक नितीन बरडे यांनी तब्बल १२५ फोटो व व्हिडिओ सादर करत या प्रकरणात मोठा भ्रष्टाचार होत असल्याचा दावा केला. यावर आयुक्त ज्ञानेश्वर ढेरे यांनी तात्काळ दखल घेत दोषींवर गुन्हे दाखल करण्याचे आदेश दिले.

अधिकाऱ्यांवर संताप; आंदोलनाचा इशारा

समता नगर परिसरात घंटागाडी सेवा बंद असल्याने नागरिक त्रस्त असल्याचा मुद्दा उपस्थित करत नितीन बरडे यांनी संताप व्यक्त केला. “तात्काळ सेवा सुरू न झाल्यास कचरा आयुक्तांच्या बंगल्यासमोर टाकू,” असा इशाराही त्यांनी दिला.

दरम्यान, माजी महापौर विष्णू भंगाळे यांनी जळगाव-भुसावळ रोडवरील स्वामीनारायण मंदिर परिसरातील पाणीटंचाईचा प्रश्न मांडत प्रशासनाच्या दुर्लक्षावर टीका केली.