पाचोरा येथे मातीचे घर कोसळून १२ वर्षीय मुलाचा मृत्यू, एक जखमी

पाचोरा येथे मातीचे घर कोसळून १२ वर्षीय मुलाचा मृत्यू, एक जखमी

पाचोरा (प्रतिनिधी) : तालुक्यात सुरू असलेल्या अतिवृष्टीमुळे शहरातील कृष्णापुरी भागातील टेकडीगल्लीत धाब्याचे घर कोसळून १२ वर्षीय मुलगा ढिगाऱ्याखाली दबून मृत्युमुखी पडला, तर दुसरा मुलगा जखमी झाला आहे. या घटनेने परिसरात हळहळ व्यक्त होत आहे.

मृत मुलाचे नाव महेश नितिन राणे (वय १२, रा. लोंढे, ता. चाळीसगाव) असे असून तो विधवा आईचा एकुलता एक मुलगा होता. महेश शिक्षणासाठी पाचोर्‍यातील नातेवाईकांकडे राहत होता. २९ सप्टेंबर रोजी दुपारी तो आणि त्याचा मावसभाऊ योगेश पाटील घराच्या मागील भागात झोपले असताना अचानक धाब्याचा भाग कोसळला. स्थानिक नागरिकांच्या मदतीने ढिगारा हटवून दोघांना बाहेर काढण्यात आले. त्यांना तातडीने ग्रामीण रुग्णालयात नेण्यात आले असता वैद्यकीय अधिकाऱ्यांनी महेशला मृत घोषित केले, तर जखमी योगेशवर उपचार सुरू आहेत.

गेल्या वीस दिवसांपासून सुरू असलेल्या सततच्या पावसामुळे घराची भिंत व पाया ओलसर होऊन दुर्घटना घडल्याचा प्राथमिक अंदाज व्यक्त करण्यात आला आहे. घटनेनंतर नगरपालिका मुख्याधिकारी मंगेश देवरे, तहसीलदार विजय बनसोडे, पोलीस निरीक्षक राहुलकुमार पवार यांच्यासह स्थानिक लोकप्रतिनिधींनी घटनास्थळाची पाहणी करून कुटुंबीयांचे सांत्वन केले.

या घटनेमुळे विधवा आईचा आधार हरपल्याने परिसरात शोककळा पसरली आहे.