पाल वनक्षेत्रात मोठी कारवाई; १५ लाखांचा अवैध डिंक जप्त, चौघे अटकेत
गारबर्डी परिसरात वनविभागाचा धाडसी छापा; ७,५०० किलो डिंक आणि वाहने ताब्यात
पाल (ता. रावेर):वनविभागाच्या पथकाने गारबर्डी परिमंडळातील कक्ष क्रमांक ३२ मध्ये अवैधरित्या डिंक संकलन आणि वाहतूक करणाऱ्या रॅकेटचा पर्दाफाश केला आहे. या कारवाईत चार आरोपींना रंगेहात पकडण्यात आले असून, त्यांच्याकडून तब्बल १५ लाख रुपये किमतीचा ७,५०० किलो डिंक जप्त करण्यात आला आहे.
मध्य प्रदेशातील चार आरोपींना रंगेहात पकडले
वनविभागाच्या पथकाने गस्तीदरम्यान गणदास गबू डुडवे (३८), अमित सुजाण मोरे (२१), सावन रणजित मोरे (२४, सर्व रा. मेंढागड, जि. खरगोन, म.प्र.) आणि हेमराज होरपाल चव्हाण (२२, रा. मांडवखेडा, जि. खरगोन) या चौघांना ताब्यात घेतले. सुरुवातीला त्यांच्याकडून ११० किलो धावडा डिंक जप्त करण्यात आला होता.
गोदामावरील छाप्यात १५ लाखांचा मुद्देमाल
पकडलेल्या आरोपींच्या चौकशीतून मिळालेल्या माहितीनुसार, पाल येथील एका व्यापाऱ्याच्या अवैध गोदामावर धाड टाकण्यात आली. या ठिकाणी धावडा, सलाई आणि कड प्रजातीचा एकूण ७,५०० किलो डिंक साठवलेला आढळला. तसेच गुन्ह्यात वापरलेली एक शाईन (MP 10 ZA 8140) आणि एक स्प्लेंडर (MH 19 N 5308) ही दोन वाहनेही वनविभागाने जप्त केली आहेत.
या अधिकाऱ्यांच्या मार्गदर्शनाखाली झाली कारवाई
ही धडक कारवाई उपवनसंरक्षक कृष्णा भवर, सहायक वनसंरक्षक सत्यजित निकत यांच्या मार्गदर्शनाखाली वनपरिक्षेत्र अधिकारी शीतल नगराळे व त्यांच्या पथकाने केली. या मोहिमेत वनपाल संभाजी सूर्यवंशी, मोहसीन तडवी, रणधीर काटे यांच्यासह रावेरचे पोलीस निरीक्षक डॉ. विशाल जयस्वाल यांची विशेष मदत लाभली.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
