पाळधीतील भवानी माता मंदिरात चोरी; १०-१२ महिलांची मंगळसूत्रे लंपास

पाळधीतील भवानी माता मंदिरात चोरी; १०-१२ महिलांची मंगळसूत्रे लंपास

यात्रेत पोलिस बंदोबस्ताचा अभाव; गर्दीचा फायदा घेत भुरट्या चोरट्यांची हातसफाई

पाळधी, ता. धरणगाव : येथील भवानी माता मंदिरातील यात्रेदरम्यान भुरट्या चोरट्यांनी गर्दीचा फायदा घेत १० ते १२ महिलांच्या गळ्यातील मंगळसूत्रांसह सोन्याचे दागिने लंपास केल्याची घटना घडली. या प्रकारामुळे परिसरात मोठी खळबळ उडाली असून यात्रेसारख्या मोठ्या गर्दीत पोलिस बंदोबस्त नसल्याने नाराजी व्यक्त होत आहे.
चैत्र शुद्ध चतुर्दशीच्या निमित्ताने पाळधी खुर्द येथील टेकडीवरील भवानी माता मंदिरात मोठ्या प्रमाणावर यात्रा भरली होती. परिसरातील विविध गावांमधून भाविक दर्शनासाठी मोठ्या संख्येने उपस्थित होते. यात्रेनिमित्त अनेक दुकानेही लावण्यात आली होती. मात्र, एवढ्या मोठ्या गर्दीच्या ठिकाणी पोलिस बंदोबस्त नसल्याचा फायदा चोरट्यांनी घेतला.

रात्री ८ ते ९ वाजण्याच्या सुमारास अचानक झालेल्या गर्दीत चोरट्यांनी महिलांच्या गळ्यातील मंगळसूत्र व इतर सोन्याचे दागिने लांबवले. काही ठिकाणी मंगळसूत्रातील काळे मणी जागेवरच टाकून त्यातील सोने घेऊन चोरट्यांनी पोबारा केल्याचे समोर आले आहे. ही घटना लक्षात येताच महिलांनी आक्रोश केला, तर उपस्थित भाविकांनी त्यांना धीर दिला.

या घटनेनंतर स्थानिकांनी पोलिस प्रशासनाला माहिती दिली. यात्रेसारख्या मोठ्या कार्यक्रमात पोलिस बंदोबस्त ठेवणे आवश्यक असताना तो न ठेवल्यामुळेच अशा घटना घडल्याची प्रतिक्रिया प्रतापराव पाटील यांनी व्यक्त केली. पुढील काळात अशा गर्दीच्या ठिकाणी कडक बंदोबस्त ठेवण्याची मागणी नागरिकांकडून केली जात आहे.