पाहुणी बनून आली अन् दागिन्यांवर डल्ला

पाहुणी बनून आली अन् दागिन्यांवर डल्ला

शिवकॉलनीत ९७ हजारांचे दागिने लंपास; महिलेविरुद्ध गुन्हा दाखल

जळगाव (प्रतिनिधी) : विश्वासाचा गैरफायदा घेत पाहुणी म्हणून घरात राहायला आलेल्या महिलेनेच घरातील सोन्या-चांदीच्या दागिन्यांवर डल्ला मारल्याची धक्कादायक घटना शिवकॉलनी परिसरात उघडकीस आली आहे

. या प्रकरणी ९७ हजार रुपयांच्या दागिन्यांची चोरी झाल्याने परिसरात खळबळ उडाली असून संबंधित महिलेविरुद्ध रामानंद नगर पोलीस ठाण्यात गुन्हा दाखल करण्यात आला आहे.
शहरातील शिवकॉलनी परिसरात राहणाऱ्या दीपिका संदीप पाटील (वय ३९) यांच्या घरी अश्वीनी हर्षल वाघ (रा. लोहगाव, ता. शिंदखेडा) ही महिला दोन दिवसांसाठी पाहुणी म्हणून आली होती. मात्र, घरातील परिस्थितीचा अंदाज घेत तिने चोरीचा डाव आखला. दरम्यान, ६ एप्रिल रोजी दीपिका पाटील या थेरेपीसाठी बाहेर गेल्या असताना, संधी साधून अश्वीनी वाघ हिने घरातील ५ ग्रॅमची सोन्याची पोत, दोन अंगठ्या तसेच चांदीचे दागिने असा एकूण ९७ हजार रुपयांचा ऐवज लंपास करून पलायन केले.

दीपिका पाटील या संध्याकाळी घरी परतल्यानंतर घरातील दागिने गायब असल्याचे लक्षात येताच त्यांनी तातडीने पोलिसांत धाव घेतली. याप्रकरणी ७ एप्रिल रोजी रामानंद नगर पोलीस ठाण्यात तक्रार दाखल करण्यात आली असून पोलिसांनी अश्वीनी वाघ हिच्याविरुद्ध गुन्हा नोंदवला आहे.

विशेष म्हणजे, संबंधित महिलेच्या पतीने यापूर्वी नोकरीचे आमिष दाखवून मोठी रक्कम घेतल्याचाही प्रकार समोर आला आहे. या पार्श्वभूमीवर या प्रकरणाला अधिक गंभीर स्वरूप प्राप्त झाले असून पोलिसांकडून सखोल तपास सुरू आहे.