पिंपळगाव खुर्द येथे विजेचा धक्का लागून विद्यार्थ्याचा दुर्दैवी मृत्यू

पिंपळगाव खुर्द येथे विजेचा धक्का लागून विद्यार्थ्याचा दुर्दैवी मृत्यू

​इलेक्ट्रिक मोटार जोडताना काळाचा घाला; श्रीराम नगरसह संपूर्ण गावावर शोककळा

​वरणगाव | प्रतिनिधी
भुसावळ तालुक्यातील पिंपळगाव खुर्द येथील श्रीराम नगर परिसरात एका १४ वर्षीय शालेय विद्यार्थ्याचा विजेचा तीव्र धक्का (शॉक) लागून मृत्यू झाल्याची हृदयद्रावक घटना रविवारी (दि. १) दुपारी घडली. धिरज कोळी असे या दुर्दैवी मृत विद्यार्थ्याचे नाव असून, तो पिंपळगाव येथील हरी किटकुल बढे प्राथमिक विद्यालयात शिक्षण घेत होता. ऐन उमेदीच्या वयात घडलेल्या या घटनेमुळे परिसरात सर्वत्र हळहळ व्यक्त होत आहे.
​मिळालेल्या माहितीनुसार, रविवारी दुपारी एक वाजेच्या सुमारास धिरज घरात एकटाच होता. त्याचे आई-वडील कामासाठी शेतात गेले होते. त्याच वेळी नळाला पाणी आल्याने धिरज पाणी भरण्यासाठी घरातील इलेक्ट्रिक मोटार सुरू करायला गेला. मोटार सुरू करण्यासाठी प्लग जोडत असताना त्याला विजेचा जोरदार धक्का बसला. हा झटका इतका तीव्र होता की, धिरजचा जागीच मृत्यू झाला. काही वेळाने ही घटना उघडकीस आली, तेव्हा परिसरातील नागरिकांनी धाव घेतली, मात्र तोपर्यंत उशीर झाला होता.
​धिरज हा अभ्यासात अत्यंत हुशार आणि मनमिळावू स्वभावाचा होता. त्याच्या अचानक जाण्यामुळे शाळेतील शिक्षक आणि सहकाऱ्यांनी तीव्र दुःख व्यक्त केले आहे. त्याच्या पश्चात आई-वडील, आजी आणि एक मोठा भाऊ असा परिवार आहे. घरातील पाण्याचे नियोजन करताना घडलेल्या या अपघाताने एका कष्टकरी कुटुंबातील हसता-खेळता मुलगा हिरावला गेल्याने पिंपळगाव खुर्द गावावर दुःखाचे डोंगर कोसळले आहे. या घटनेनंतर घरगुती विद्युत उपकरणांचा वापर करताना नागरिकांनी विशेष खबरदारी घेण्याचे आवाहन करण्यात येत आहे.