पिकअपचा पाठलाग; पोलिसांवर दगडफेक, १० गुरांची सुटका

पिकअपचा पाठलाग; पोलिसांवर दगडफेक, १० गुरांची सुटका

मास्टर कॉलनीत पहाटेची धक्कादायक घटना; ३ लाखांचा मुद्देमाल जप्त

जळगाव : अमळनेर येथून संशयास्पदरीत्या जळगावकडे येणाऱ्या एका पिकअप गाडीचा पाठलाग करणाऱ्या पोलिस पथकावर शहरातील मास्टर कॉलनी परिसरात जमावाने दगडफेक केल्याची धक्कादायक घटना ४ मार्च रोजी पहाटे घडली. या कारवाईदरम्यान पोलिसांनी पिकअपमधील १० गुरांची सुटका करत सुमारे ३ लाख रुपयांचा मुद्देमाल जप्त केला आहे.
मिळालेल्या माहितीनुसार, अमळनेरकडून धरणगावमार्गे बोलेरो पिकअप (एमपी ०४ जीबी ३७७) भरधाव वेगात जळगावकडे येत असल्याची माहिती नियंत्रण कक्षाला मिळाली होती. त्यानंतर अमळनेर आणि धरणगाव पोलिसांनी गाडीचा पाठलाग सुरू केला. ही गाडी शहरातील मास्टर कॉलनी परिसरात दाखल झाल्यानंतर एमआयडीसी पोलिस स्टेशनचे रात्रगस्तीवरील पथकही मदतीसाठी दाखल झाले.

दरम्यान, पोलिसांनी गाडी अडवण्याचा प्रयत्न केला असता परिसरातील काही जणांनी पोलिसांवर दगडफेक सुरू केली. या तणावपूर्ण परिस्थितीतही पोलिसांनी पिकअप गाडीची झडती घेतली. त्यावेळी गाडीत सुमारे १ ते १.५ वर्षे वयाची १० गुरे पाय व तोंड दोरीने घट्ट बांधलेल्या अवस्थेत आढळून आली. चारा-पाण्याविना या मुक्या जनावरांना गाडीत कोंबण्यात आले होते.

पोलिसांनी तत्काळ सर्व १० गुरांची सुटका करून त्यांना औषधोपचारासाठी पाठविले. या कारवाईत २ लाख रुपये किमतीची पिकअप गाडी आणि सुमारे १ लाख रुपये किमतीची गुरे असा एकूण ३ लाख रुपयांचा मुद्देमाल जप्त करण्यात आला.

या प्रकरणी एमआयडीसी पोलिसांनी पिकअप चालक, मालक तसेच दगडफेक करणाऱ्या सुमारे ३० ते ३५ जणांविरुद्ध शासकीय कामात अडथळा आणणे, प्राण्यांवर क्रूरता करणे व दंगल घडविण्याच्या आरोपाखाली गुन्हा दाखल केला असून पुढील तपास सुरू आहे.