पूर्ववैमनस्यातून रिक्षा स्टॉपवर तरुणावर चॉपरने हल्ला

पूर्ववैमनस्यातून रिक्षा स्टॉपवर तरुणावर चॉपरने हल्ला

हॉटेल आदित्याजवळ घटना; दोघांविरुद्ध एमआयडीसी पोलीस ठाण्यात गुन्हा

जळगाव (प्रतिनिधी) : शहरातील हॉटेल आदित्याजवळील रिक्षा स्टॉपवर पूर्ववैमनस्यातून एका तरुणावर चॉपरसारख्या धारदार शस्त्राने वार करून त्याला जखमी केल्याची खळबळजनक घटना घडली आहे. या प्रकरणी एमआयडीसी पोलीस ठाण्यात दोन जणांविरुद्ध गुन्हा दाखल करण्यात आला आहे.
मिळालेल्या माहितीनुसार, रामेश्वर कॉलनीतील रहिवासी हर्षल विनोद वाणी (वय २०) हे दि. २५ मार्च रोजी रात्री ११ वाजेच्या सुमारास बंगला चौकातील रिक्षा स्टॉपजवळ उभे होते. त्यावेळी संशयित आरोपी दारूच्या नशेत तेथे आले. त्यांनी फिर्यादीस “तू माझ्या भावाला मागच्या वेळी का मारहाण केली होती?” असा जाब विचारत शिवीगाळ सुरू केली.
यानंतर वादाचे रूपांतर हाणामारीत झाले. दरम्यान, आरोपींपैकी एकाने खिशातील चॉपरसारखे धारदार शस्त्र काढून हर्षलच्या पाठीवर वार केला. या हल्ल्यात हर्षल गंभीर जखमी झाला असून त्याच्यावर उपचार सुरू आहेत.

घटनेनंतर फिर्यादीच्या तक्रारीवरून एमआयडीसी पोलीस ठाण्यात संबंधित दोघांविरुद्ध गुन्हा दाखल करण्यात आला आहे. या प्रकरणाचा पुढील तपास पोलीस निरीक्षक चंद्रकांत धनके यांच्या मार्गदर्शनाखाली पोलीस हेडकॉन्स्टेबल योगेश बेलदार करीत आहेत. शहरात वाढत्या गुन्हेगारीमुळे नागरिकांमध्ये भीतीचे वातावरण निर्माण झाले आहे.