पेट्रोल पंपावरून १५ लाखांचा डंपर लंपास; पशुधन चोरीचाही प्रकार उघड

पेट्रोल पंपावरून १५ लाखांचा डंपर लंपास; पशुधन चोरीचाही प्रकार उघड

अमळनेर तालुक्यात चोरट्यांचा सुळसुळाट; पोलिसांचा तपास सुरू

अमळनेर : तालुक्यात चोरट्यांनी धुमाकूळ घालत दोन वेगवेगळ्या घटनांमध्ये मोठ्या किंमतीचा माल लंपास केल्याचे समोर आले आहे. गांधली येथील पेट्रोल पंपावर उभा असलेला सुमारे १५ लाख रुपये किमतीचा डंपर अज्ञात चोरट्यांनी पळवून नेला, तर ढेकू परिसरातून पशुधन चोरीचा प्रकारही घडला आहे

.
पेट्रोल पंपावरून डंपर चोरी

हिंगोणे येथील निलेश संजय पाटील यांचा एमएच ४८ एजी ८३०७ क्रमांकाचा डंपर ३१ तारखेला सायंकाळी गांधली येथील सप्तश्रृंगी पेट्रोल पंपावर उभा करण्यात आला होता. रात्री साडेअकराच्या सुमारास हा डंपर चोरीला गेल्याचे उघड झाले. घटनेची माहिती मिळताच पोलिस निरीक्षक दत्तात्रय निकम यांनी तातडीने पथक पाठवले.

सीसीटीव्ही फुटेज व तांत्रिक तपासातून आरोपी डंपर पातोंडा मार्गे चोपडा मार्गाने गुजरातकडे घेऊन गेल्याचा प्राथमिक अंदाज आहे. या प्रकरणी गुन्हा दाखल करण्यात आला असून पुढील तपास पोलीस उपनिरीक्षक नामदेव बोरकर करीत आहेत.

ढेकूतून ८७ हजारांचे पशुधन चोरी
दरम्यान, अमळनेर तालुक्यातील ढेकू खुर्द येथील महेंद्र सयाजीराव पाटील यांच्या शेतातून अज्ञात चोरट्यांनी चार गायी व एक गोऱ्हा असा एकूण सुमारे ८७ हजार रुपये किमतीचा पशुधन चोरीला नेला आहे. ही घटना १ एप्रिलच्या रात्री घडली.
या प्रकरणी अमळनेर पोलिस ठाण्यात गुन्हा दाखल करण्यात आला असून हेडकॉन्स्टेबल लक्ष्मीकांत शिंपी पुढील तपास करीत आहेत.
एकाच वेळी घडलेल्या या घटनांमुळे परिसरात भीतीचे वातावरण निर्माण झाले असून पोलिसांनी गस्त वाढवण्याची मागणी नागरिकांकडून होत आहे.