जळगाव: पैशांच्या वादातून एका २१ वर्षीय विद्यार्थ्याला तीन जणांनी बेदम मारहाण केल्याची घटना २२ ऑगस्ट रोजी घडली. मारहाण केल्यानंतर त्याला दुचाकीवर बसवून दुसऱ्या ठिकाणी नेऊनही मारहाण करण्यात आली. या प्रकरणी रामानंद नगर पोलीस ठाण्यात तीन जणांविरुद्ध गुन्हा दाखल करण्यात आला आहे.
द्रौपदीनगर येथील रहिवासी अथर्व महेश मुंदडा (वय २१) आणि वाघ नगर येथील प्रथमेश तायडे यांच्यामध्ये पैशांवरून वाद सुरू होता. याच वादातून प्रथमेश तायडे, दुर्गस पाथरकर (रा. दूध फेडरेशनजवळ) आणि अभिषेक कुलकर्णी (रा. बळीराम पेठ) या तिघांनी मिळून अथर्वला शिवकॉलनीजवळ अडवले.
यावेळी त्यांनी अथर्वला बेदम मारहाण केली आणि त्याच्या डोक्यात दगड मारून त्याला जखमी केले. त्यानंतर त्याला दुचाकीवर बसवून शिरसोली रस्त्यावर नेण्यात आले, जिथे पुन्हा त्याला मारहाण करण्यात आली. ‘प्रथमेशचे पैसे दिले नाहीस तर तुला मारून टाकू,’ अशी धमकीही त्यांनी अथर्वला दिली.
या प्रकरणी अथर्व मुंदडा याने रामानंद नगर पोलीस ठाण्यात फिर्याद दिली आहे. त्यानुसार, मारहाण करणाऱ्या तिघांविरुद्ध गुन्हा दाखल करण्यात आला असून, पोलीस पुढील तपास करत आहेत.
दै. बातमीदार चे अपडेट्स मिळवण्यासाठी आम्हाला फॉलो करा
फेसबुक । ट्विटर ।युट्युब | इंस्टाग्राम | गुगल न्यूज | टेलिग्राम
