पोलीस स्टेशन क्षेत्रभेट: कायद्याच्या रक्षकांशी विद्यार्थ्यांचा थेट संवाद

पोलीस स्टेशन क्षेत्रभेट: कायद्याच्या रक्षकांशी विद्यार्थ्यांचा थेट संवाद

जळगाव प्रतिनिधी विवेकानंद प्रतिष्ठान प्राथमिक व उच्च प्राथमिक शाळा वाघ नगर येथील इयत्ता सहावी या वर्गाच्या विद्यार्थ्यांसाठी दिनांक १८ सप्टेंबर २०२५ वार गुरुवार रोजी सार्वजनिक सुविधा या विषया अंतर्गत क्षेत्रभेट नियोजित करण्यात आली.

विद्यार्थ्यांनी सामाजिक अभ्यासाचा भाग म्हणून रामानंद नगर पोलीस स्टेशन येथे शैक्षणिक उपक्रम म्हणून क्षेत्रभेट दिली. या भेटीचा उद्देश पोलीस खात्याचे कार्य प्रत्यक्ष अनुभवणे आणि कायद्याची अंमलबजावणी कशी केली जाते, हे समजून घेणे होता. याबाबत पोलीस कॉन्स्टेबल सागर कुमार देवरे यांनी विद्यार्थ्यांना मार्गदर्शन केले.

विद्यार्थ्यांनी पोलीस स्टेशनमधील विविध विभाग तक्रार नोंदणी कक्ष, तपास विभाग, बंदीगृह, आणि सीसीटीव्ही नियंत्रण कक्ष यांना भेट दिली. विद्यार्थ्यांशी संवाद साधून कायदा, शिस्त, आणि नागरिकांची सुरक्षा याबद्दल मार्गदर्शन व सविस्तर माहिती दिली.
पोलीस खात्याच्या विविध उपक्रमांबद्दल माहिती देताना, त्यांनी ‘सायबर गुन्हे प्रतिबंध’, ‘महिला सुरक्षा’, आणि ‘नशामुक्ती मोहिमा’ यावर विशेष भर दिला.वरिष्ठ पोलीस निरीक्षक श्री. राजेंद्र गुंजाळ यांनी विद्यार्थ्यांना पोलीस यंत्रणेच्या कार्यपद्धतीची माहिती दिली याप्रसंगी विवेकानंद प्रतिष्ठानच्या सेमी विभागातील 79 विद्यार्थ्यांची व शिक्षकांची उपस्थिती होती.

ही क्षेत्रभेट विद्यार्थ्यांसाठी शैक्षणिकदृष्ट्या तसेच सामाजिक जाणीव वाढवणारी ठरली. पोलिसांची कठोर मेहनत आणि सतर्कता याचे महत्त्व विद्यार्थ्यांना प्रत्यक्ष समजले. “पोलीस फक्त गुन्हेगारांना पकडत नाहीत, तर समाजात शांतता आणि विश्वास निर्माण करतात,” असे विद्यार्थ्यांचे मत होते. सदर क्षेत्रभेटीचे नियोजन प्रकल्प प्रमुख सौ पूनम खर्चाणे यांनी केले . क्षेत्रभेटीसाठी समन्वयक श्री सचिन गायकवाड , सौ मयुरी सुलक्षणे, सौ संध्या देशमुख व श्री स्वप्निल पाटील उपस्थित होते . सदर क्षेत्रभेटीसाठी मुख्याध्यापक श्री हेमराज पाटील सर यांचे मार्गदर्शन लाभले.