प्रभाग क्रमांक १५ मध्ये मुलींसाठी HPV कॅन्सर प्रतिबंधक लसीकरण शिबिराचा शुभारंभ

प्रभाग क्रमांक १५ मध्ये मुलींसाठी HPV कॅन्सर प्रतिबंधक लसीकरण शिबिराचा शुभारंभ

पालक व मुलींचा उत्स्फूर्त प्रतिसाद

जळगाव : मुलींच्या आरोग्याबाबत जागरूकता निर्माण व्हावी आणि भविष्यात होणाऱ्या गंभीर आजारांपासून त्यांचे संरक्षण व्हावे या उद्देशाने प्रभाग क्रमांक १५ मध्ये मुलींसाठी कॅन्सर प्रतिबंधक HPV लसीकरण शिबिराचे आयोजन करण्यात आले. शुक्रवार, दिनांक १३ मार्च रोजी कै. नानीबाई अग्रवाल दवाखाना येथे या उपक्रमाचा शुभारंभ करण्यात आला.
या शिबिरात १४ वर्षे पूर्ण झालेल्या मुलींना HPV (ह्युमन पॅपिलोमा व्हायरस) लस देण्यात आली. ही लस महिलांमध्ये होणाऱ्या Cervical Cancer (गर्भाशयाच्या मुखाचा कर्करोग) या अत्यंत घातक आजाराच्या प्रमुख प्रकारांपासून संरक्षण देण्यासाठी प्रभावी मानली जाते. भविष्यात महिलांमध्ये आढळणाऱ्या कर्करोगाच्या धोक्याचे प्रमाण कमी करण्यासाठी या लसीकरणाचे मोठे महत्त्व असल्याचे यावेळी तज्ज्ञ डॉक्टरांनी सांगितले.
कार्यक्रमात उपस्थित पालक व मुलींना कर्करोग प्रतिबंध, HPV संसर्ग, लसीकरणाचे महत्त्व तसेच आरोग्याबाबत जागरूक राहण्याची आवश्यकता याबाबत सविस्तर मार्गदर्शन करण्यात आले. समाजात आरोग्याबाबत जागरूकता निर्माण करण्यासाठी अशा उपक्रमांची आवश्यकता असल्याचेही मान्यवरांनी नमूद केले.
या कार्यक्रमाला डॉ. राम रावलानी, डॉ. कुलकर्णी, नगरसेवक अरविंद देशमुख, प्रकाश बालाणी, रेश्मा कुंदन काळे, चेतना शिरसाळे, रितेश ढेकळे आदी मान्यवर उपस्थित होते.
लसीकरण शिबिर यशस्वी होण्यासाठी वैद्यकीय पथकाने महत्त्वपूर्ण भूमिका बजावली. यामध्ये डॉ. सोनल जोशी, डॉ. निकिता काळे, परिचारिका हर्षद कुलकर्णी यांच्यासह सर्व ANM कर्मचारी, आशा वर्कर तसेच दवाखान्याचा संपूर्ण स्टाफ यांनी सक्रिय सहभाग घेतला आणि शिबिर यशस्वी करण्यासाठी परिश्रम घेतले.
शिबिराला परिसरातील पालक व मुलींचा उत्स्फूर्त प्रतिसाद मिळाला. भविष्यातही महिलांच्या आणि मुलींच्या आरोग्याच्या दृष्टीने अशा प्रकारचे जनजागृतीपर आणि प्रतिबंधात्मक आरोग्य उपक्रम सातत्याने राबवले जातील, असे यावेळी आयोजकांनी सांगितले.