प्रवाशाची रोकड लंपास करणाऱ्या ‘त्रिकुटा’च्या मुसक्या आवळल्या

प्रवाशाची रोकड लंपास करणाऱ्या ‘त्रिकुटा’च्या मुसक्या आवळल्या

एमआयडीसी पोलिसांची कारवाई

जळगाव प्रतिनिधी बसमध्ये चढणाऱ्या प्रवाशाच्या खिशातील रोकड लंपास करणाऱ्या तीन पाकीटमारांना एमआयडीसी पोलिसांनी अटक करून चोरीस गेलेली संपूर्ण १५ हजार रक्कम हस्तगत केली आहे. सीसीटीव्ही फुटेज आणि गुप्त माहितीच्या आधारे एमआयडीसी पोलिसांनी हि कारवाई केली

मिळालेल्या माहितीनुसार, शेख कलीम शेख इसाक (वय ५०, रा. यावल) हे १ डिसेंबर रोजी पत्नीच्या उपचारासाठी जळगाव येथे आले होते. उपचारानंतर ते अजिंठा चौफुली परिसरात बसमध्ये चढत असताना, त्यांच्या पाठीमागून आलेल्या एका अनोळखी व्यक्तीने त्यांच्या पॅन्टच्या खिशातील १५ हजार रोख रक्कम चोरून नेली. याप्रकरणी एमआयडीसी पोलिस ठाण्यात अज्ञात व्यक्तीविरुद्ध गुन्हा दाखल करण्यात आला होता.

घटनेची गंभीर दखल घेत पोलीस निरीक्षक बबन आव्हाड यांनी गुन्हे शोध पथकाला तात्काळ आरोपींचा शोध घेण्याचे आदेश दिले. त्यानुसार पथकाने परिसरातील सीसीटीव्ही फुटेजचे बारकाईने परीक्षण करून तसेच गुप्त माहितीच्या आधारे आरोपींची ओळख पटवली.

तपासात रजा कॉलनी परिसरातील तीन युवक हा गुन्हा केल्याचे निष्पन्न झाले. यामध्ये हमीद अय्युब खान (वय २२, रा. अक्सा नगर, जळगाव),समीर खान अफसर खान (वय २२, रा. शेरा चौक, जळगाव) , शोहेब मेहमुद पटेल (वय २३, रा. शेरा चौक, रजा कॉलनी, जळगाव) असे अटक केलेल्या आरोपींची नावे असून या तिघांकडून चोरीस गेलेली संपूर्ण १५ हजार रुपयांची रोकड पोलिसांनी जप्त केली आहे.

ही कारवाई पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली. कारवाईत पोउपनि राहुल तायडे, पोउपनि चंद्रकांत धनके, सफौ विजयसिंग पाटील, किरण पाटील, गिरीष पाटील, प्रदिप चौधरी, विशाल कोळी यांनी सहकार्य केले. पुढील तपास पोहेकॉ गिरीष पाटील करीत आहेत.