प्रेमप्रकरणातून दोन सख्ख्या भावांना कारने चिरडण्याचा प्रयत्न; रावेर तालुक्यात खळबळ

प्रेमप्रकरणातून दोन सख्ख्या भावांना कारने चिरडण्याचा प्रयत्न; रावेर तालुक्यात खळबळ

सावदा प्रतिनिधी : प्रेमसंबंधाच्या वादातून रागाच्या भरात एका तरुणाने भरधाव वेगाने कार चालवून दोन सख्ख्या भावांना चिरडण्याचा प्रयत्न केल्याची धक्कादायक घटना रावेर तालुक्यातील उदळी बुद्रुक शिवारात घडली आहे. या हल्ल्यात दोघेही भाऊ गंभीर जखमी झाले असून, आरोपीला अटक करण्यात आली आहे.

उदळी बुद्रुक येथील गौरव सुरेश पाटील (वय २०) आणि त्याचा भाऊ कुणाल सुरेश पाटील यांच्यावर हा हल्ला झाला. कुणाल पाटीलचे आरोपी गोपी उर्फ सुशील सुभाष पाटील याच्या पुतणीसोबत प्रेमसंबंध होते. याच रागातून गोपीने हल्ला करण्याचा कट रचला.

२ सप्टेंबर रोजी सकाळी साडेसात वाजता गौरव आणि कुणाल दोघेही त्यांच्या दुचाकीवरून शेतात फवारणीसाठी निघाले होते. नदीच्या रस्त्यावरून जात असताना गोपी पाटीलने आपली कार (क्रमांक MH 19 DC 4191) वेगाने त्यांच्या दिशेने चालवत आणली आणि जोरदार धडक दिली. धडकेनंतरही तो थांबला नाही, तर त्याने कार रिव्हर्स घेऊन पुन्हा त्यांना चिरडण्याचा प्रयत्न केला.

या हल्ल्यात गौरव पाटीलचा उजवा हात मोडला असून, दोघेही गंभीर जखमी झाले आहेत. त्यांना तात्काळ फैजपूर येथील डॉ. खाचणे यांच्या रुग्णालयात दाखल करण्यात आले आहे, जिथे त्यांच्यावर उपचार सुरू आहेत.

या प्रकरणी जखमी गौरव पाटील यांच्या फिर्यादीवरून गोपी उर्फ सुशील पाटीलविरुद्ध खुनाचा प्रयत्न (कलम ३०७) आणि इतर संबंधित कलमांखाली सावदा पोलीस ठाण्यात गुन्हा दाखल करण्यात आला आहे. पोलिसांनी आरोपीला तात्काळ अटक केली असून, त्याला ८ सप्टेंबरपर्यंत पोलीस कोठडी सुनावण्यात आली आहे. सहायक पोलीस निरीक्षक विशाल पाटील यांच्या मार्गदर्शनाखाली पोलीस उपनिरीक्षक राहुल सानप पुढील तपास करत आहेत.