प्लॉटच्या वादातून व्यापाऱ्याच्या घरावर दगडफेक; मेहरुणमध्ये टोळक्याचा हल्ला

प्लॉटच्या वादातून व्यापाऱ्याच्या घरावर दगडफेक; मेहरुणमध्ये टोळक्याचा हल्ला

२० ते २५ जणांविरुद्ध दंगलीचा गुन्हा; दुचाकीचे नुकसान, तिघे जखमी

जळगाव : मेहरुण परिसरात प्लॉटच्या वादातून व्यापाऱ्याच्या घरावर २० ते २५ जणांच्या टोळक्याने दगडफेक करत हल्ला केल्याची घटना ३१ मार्च रोजी सायंकाळी साडेपाचच्या सुमारास घडली. या हल्ल्यात दुचाकीचे नुकसान झाले असून तीन जण जखमी झाले आहेत. याप्रकरणी एमआयडीसी पोलिस ठाण्यात दंगलीचा गुन्हा दाखल करण्यात आला आहे.
मिळालेल्या माहितीनुसार, अशोक किराणा परिसरातील रहिवासी अकील महेमूद शहा (वय ६२) यांच्या घरासमोर असलेल्या रिकाम्या प्लॉटच्या कारणावरून वाद सुरू होता. या वादातून इमरान शरीफ खान उर्फ आयके याने शहा तसेच शोएब खाटीक यांच्याशी वाद घातला. या प्रकरणी शोएब खाटीक यांनी पोलिसांत तक्रार दिल्याचा राग मनात धरून इमरान खान याने गैरकायद्याची मंडळी जमवून शहा यांच्या घरावर हल्ला चढवला.

टोळक्याने हातात लाठ्या-काठ्या, विटा घेऊन शहा यांच्या घरावर तुफान दगडफेक केली. तसेच घरासमोर उभ्या असलेल्या दुचाकीची तोडफोड करून नुकसान केले. हल्ल्यानंतर टोळके घटनास्थळावरून पसार झाले.

या प्रकरणी अकील महेमूद शहा यांनी दिलेल्या तक्रारीवरून इमरान शरीफ खान, इरफान शरीफ खान, वसीम घंटी, जाबीर खान मुलतानी, अशफाक खान मुलतानी, शाबास खान, अब्दुल रहेमान मुलतानी, रईस खान उर्फ कानकट्या, अदनान मुलतानी (सर्व रा. मास्टर कॉलनी) तसेच एजाज लाला (रा. गेंदालाल मिल) यांच्यासह अन्य अनोळखी व्यक्तींविरुद्ध गुन्हा दाखल करण्यात आला आहे. पुढील तपास उपनिरीक्षक अशोक काळे करीत आहेत.