फिरत्या विज्ञान प्रयोगशाळेतून ३,९०४ विद्यार्थ्यांना विज्ञानाची गोडी

फिरत्या विज्ञान प्रयोगशाळेतून ३,९०४ विद्यार्थ्यांना विज्ञानाची गोडी

शहादा परिसरातील शाळांमध्ये प्रात्यक्षिकांसह प्रयोगांचे सादरीकरण

जळगाव (प्रतिनिधी) : कवयित्री बहिणाबाई चौधरी उत्तर महाराष्ट्र विद्यापीठ व राजीव गांधी विज्ञान व तंत्रज्ञान आयोग यांच्या संयुक्त विद्यमाने राबविण्यात येणाऱ्या फिरत्या विज्ञान प्रयोगशाळेच्या माध्यमातून शहादा व परिसरातील विविध शैक्षणिक संस्थांना दि. २७ व २८ मार्च २०२६ रोजी भेट देण्यात आली. या उपक्रमात विद्यार्थ्यांना प्रत्यक्ष प्रयोगांच्या माध्यमातून विज्ञानाची ओळख करून देण्यात आली.

फिरत्या प्रयोगशाळेच्या बसमध्ये भौतिकशास्त्र, जीवनशास्त्र, रसायनशास्त्र आणि संगणकशास्त्र या विषयांशी संबंधित एकूण ३० प्रयोगांचे सादरीकरण करण्यात आले. दि. २७ मार्च रोजी शासकीय आश्रम शाळा गणोर, एकलव्य मॉडेल रेसिडेन्शियल स्कूल शहादा आणि शासकीय आश्रम शाळा शहादा येथे प्रयोगांचे प्रात्यक्षिक दाखवण्यात आले. तर दि. २८ मार्च रोजी नवाळपूर, दोंडाईचा आणि शहादा येथील विविध शाळांमध्ये विद्यार्थ्यांसाठी विज्ञान सत्रांचे आयोजन करण्यात आले.

मेठ व्ही. के. शाह विद्या मंदिर, कै. सौ. जी. एफ. पाटील ज्युनिअर कॉलेज, सेठ व्ही. के. शाह प्राथमिक विद्या मंदिर, शासकीय आश्रम शाळा नवाळपूर, हस्ती पब्लिक स्कूल आणि ज्युनिअर कॉलेज दोंडाईचा या संस्थांमधील विद्यार्थ्यांनी या उपक्रमात उत्स्फूर्त सहभाग नोंदवला.
या दोन दिवसीय उपक्रमातून एकूण ३,९०४ विद्यार्थ्यांपर्यंत विज्ञान विषयक माहिती पोहोचविण्यात आली. प्रा. एस. एस. घोष यांच्या मार्गदर्शनाखाली जगदीश बोडळे, रोहित भोई, पृथ्वीराज पवार, राहुल हजारी आणि गोरखनाथ बोरसे यांनी या उपक्रमाच्या यशस्वीतेसाठी परिश्रम घेतले.