बंद घर फोडून चोरी; दागिने व मूर्ती लंपास

बंद घर फोडून चोरी; दागिने व मूर्ती लंपास

 संशयित चोरटा अटकेत ; एमआयडीसी पोलिसांची  कारवाई

जळगाव : कुटुंबीय बाहेरगावी गेलेले असताना बंद घर फोडून चोरट्यांनी सोने-चांदीचे दागिने व धार्मिक मूर्ती लंपास केल्याची घटना उघडकीस आली आहे. या प्रकरणी एमआयडीसी पोलिसांनी तातडीने कारवाई करत शाकीर शेख उर्फ बंदर ताजुद्दीन (वय २३, रा. कासमवाडी) याला अटक केली आहे.

कासमवाडी परिसरातील वंदना आटाळे या २५ मार्च रोजी कुटुंबासह बाहेरगावी गेल्या होत्या. घर बंद असल्याची संधी साधत चोरट्यांनी दरवाजाचा कडीकोयंडा तोडून घरात प्रवेश केला. त्यानंतर सोन्याची फुली, चांदीची वीट, दोन मूर्ती, चंद्रकोर तसेच तांब्याचे भांडे असा सुमारे ५७ हजार रुपयांचा ऐवज चोरून नेण्यात आला.

ही घटना ४ एप्रिल रोजी उघडकीस आल्यानंतर प्रमोद आटाळे यांनी एमआयडीसी पोलिस ठाण्यात फिर्याद दिली. त्यानुसार गुन्हा दाखल करण्यात आला.

गोपनीय माहितीवरून आरोपी जेरबंद
गुन्हा दाखल होताच पोलिसांनी तपासाची चक्रे वेगाने फिरवत गोपनीय माहितीच्या आधारे संशयिताला ताब्यात घेतले. तपास अधिकारी रामकृष्ण पाटील यांच्या मार्गदर्शनाखाली ही कारवाई करण्यात आली.
अटक केलेल्या आरोपीला न्यायालयात हजर करण्यात आले असता न्यायालयाने दोन दिवसांची पोलिस कोठडी सुनावली आहे. पुढील तपास पोलिसांकडून सुरू आहे