बिडगाव कुंडयापाणी शिवारात बिबट्याचा वावर

बिडगाव कुंडयापाणी शिवारात बिबट्याचा वावर

नागरिकांना सतर्क राहण्याचा इशारा

चोपडा प्रतिनिधी

22 मार्च 2025 रोजी रात्री कुंडयापाणी परिसरात वनरक्षक आणि वनमजूर गस्त घालत असताना बिबट्याचे दर्शन झाले. उन्हाळ्यात वनवा पेटण्याच्या काळात वन विभागाचे कर्मचारी नियमित गस्त घालत असतात. यावेळी कुंडयापाणी गावालगतच्या वरील भागात बिबट्या दिसल्याने चार ते पाच वनकर्मचारी घाबरून जवळच्या दर्ग्याच्या खोलीत लपले. त्यानंतर बिबट्या चिंचपाणी भागाकडे पसार झाला.

बिडगाव, पानसेवडी, ओंकारपाडा, चांदण्या तलाव आणि मोहरद परिसरात भीतीचे वातावरण पसरले आहे. वन विभागाने अधिक कर्मचारी नेमून गस्त वाढवावी आणि बिबट्याचा बंदोबस्त करावा, अशी परिसरातील ग्रामस्थांची मागणी आहे.

सध्या शेतकऱ्यांचे गहू, हरभरा आणि मक्याचे पीक काढणीच्या अवस्थेत आहे. लाईटचा लपंडाव असल्याने बळीराजा रात्री शेतात पाणी भरण्यास जातो. बिबट्याच्या भीतीने मजूर वर्ग शेतात जाण्यास घाबरतो आहे. वन विभागाच्या कंत्राटी कर्मचाऱ्यांना सहा ते बारा महिने वेतन मिळत नसल्यानेही त्यांचा मनोबल खचला आहे. तरीही ते जीवाची बाजी लावून रात्रंदिवस कर्तव्य बजावत आहेत.

सर्व वृक्षप्रेमी आणि परिसरातील नागरिकांना आवाहन करण्यात येते की जंगलात विनाकारण जाऊ नये आणि वनवा पेटवू नये. यामुळे जंगल नष्ट होत असून प्राणी गावाकडे येण्याची शक्यता वाढत आहे. फॉरेस्ट विभागाने अधिक गस्त वाढवून बिबट्याचा बंदोबस्त करावा, अशी मागणी होत आहे.