बियर घेण्यासाठी गेलेल्या तरुणावर चाकू हल्ला; दोघ मित्रांना बेदम मारहाण

बियर घेण्यासाठी गेलेल्या तरुणावर चाकू हल्ला; दोघ मित्रांना बेदम मारहाण

आंबेडकर मार्केट परिसरातील घटना; चार अनोळखी संशयितांविरुद्ध गुन्हा
जळगाव : बियर घेण्यासाठी गेलेल्या तरुणावर धारदार शस्त्राने हल्ला करत त्याच्या दोघ मित्रांना बेदम मारहाण केल्याची धक्कादायक घटना आंबेडकर मार्केट परिसरात घडली. या प्रकरणी चार अनोळखी इसमांविरुद्ध जिल्हापेठ पोलीस ठाण्यात गुन्हा दाखल करण्यात आला आहे.

कंवरनगर, सिंधी कॉलनी येथे राहणारा चंदन संचानंद भारती (वय २७) हा ५ एप्रिल रोजी दुपारी दुकानाचे काम आटोपून (एमएच १९, ३५५५) क्रमांकाच्या दुचाकीने आंबेडकर मार्केट येथे बियर घेण्यासाठी गेला होता. गाडी लावण्याच्या कारणावरून एका अनोळखी इसमाने त्याच्याशी शिवीगाळ केली. मात्र भारती यांनी त्याकडे दुर्लक्ष केले. त्यानंतर त्यांनी ही बाब मित्र विशाल इंगळे याला सांगितली. काही वेळातच विशाल इंगळे व धीरज बाविस्कर हे घटनास्थळी आले.

दरम्यान, तिघे बियर घेऊन गाडीपाशी परतले असता तेथे १५ ते २० जणांचा जमाव जमलेला होता. या जमावातील एका इसमाने चाकूसारख्या धारदार हत्याराने चंदन भारती याच्यावर दोन वेळा वार केले. तर दुसऱ्याने फायटरने डोक्यावर प्रहार करत त्याला गंभीर जखमी केले. तसेच विशाल इंगळे व धीरज बाविस्कर या दोघांना लाथाबुक्क्यांनी बेदम मारहाण करण्यात आली.
हल्ल्यानंतर जखमींनी कसाबसा स्वतःची सुटका करून घेतली व उपचारासाठी जिल्हा शासकीय वैद्यकीय महाविद्यालय व रुग्णालयात दाखल झाले असून त्यांच्यावर उपचार सुरू आहेत.
या प्रकरणी चंदन भारती यांच्या फिर्यादीवरून जिल्हापेठ पोलीस ठाण्यात चार अनोळखी संशयितांविरुद्ध गुन्हा नोंदविण्यात आला असून पुढील तपास उपनिरीक्षक उल्हास चहाटे करीत आहेत.