बोदवडमध्ये अल्पवयीन मुलीवर अत्याचार; आरोपीला अटक

बोदवडमध्ये अल्पवयीन मुलीवर अत्याचार; आरोपीला अटक

बोदवड: तालुक्यातील एका गावातील अल्पवयीन मुलीला फूस लावून पळवून नेत तिच्यावर लैंगिक अत्याचार केल्याप्रकरणी एका तरुणाला पोलिसांनी अटक केली आहे. या घटनेमुळे परिसरात खळबळ उडाली आहे.

बोदवड तालुक्यातील एका गावात नववीत शिकणाऱ्या १५ वर्षीय मुलीला घराशेजारी बांधकाम सुरू असलेल्या ठिकाणी मजूर म्हणून काम करणाऱ्या शेख नाजिम शेख साबीर (वय ३१, रा. जाम मोहल्ला, भुसावळ, ह.मु. बोदवड) या तरुणाने २४ ऑगस्ट रोजी रात्री ८ ते १२ च्या दरम्यान पळवून नेले.

आरोपीने मुलीला सुरत, उधनासह वेगवेगळ्या ठिकाणी नेले आणि तिच्या संमतीशिवाय तिच्यावर वारंवार लैंगिक अत्याचार केले. त्यानंतर तो तिला सोडून पळून गेला. मुलीच्या आईने दिलेल्या तक्रारीवरून बोदवड पोलीस ठाण्यात अपहरणाचा गुन्हा दाखल करण्यात आला होता.

पोलिसांनी तात्काळ तपास करत आरोपीला अटक केली आहे. त्याच्याविरुद्ध भारतीय न्याय संहिता २०२३ नुसार गुन्हा दाखल करण्यात आला आहे.

आरोपीला भुसावळ न्यायालयात हजर केले असता, न्यायालयाने त्याला दोन दिवसांची पोलीस कोठडी सुनावली आहे. या प्रकरणाचा पुढील तपास फैजपूर उपविभागीय पोलीस निरीक्षक अनिल बडगुजर यांच्याकडे सोपवण्यात आला आहे.