बोदवडमध्ये नगरसेवकांचे पक्षांतर ; भाजपमध्ये केला प्रवेश

बोदवडमध्ये नगरसेवकांचे पक्षांतर ; भाजपमध्ये केला प्रवेश

एकनाथराव खडसे यांना धक्का ; राजकीय समिकरणे बदलली

बोदवड (प्रतिनिधी): होळीच्या सणाच्या पार्श्वभूमीवर बोदवड शहरात मोठे राजकीय परिवर्तन पाहायला मिळाले. 13 मार्च रोजी शिवसेनेत प्रवेश करणाऱ्या काही नगरसेवकांच्या पार्श्वभूमीवर 14 मार्च रोजी तीन नगरसेवक भाजपमध्ये दाखल झाले, ज्यामुळे आ. एकनाथ खडसेंना मोठा धक्का बसला आहे.

नगरसेवक हकीम बागवान, नगरसेवक मुजम्मील शाह आणि नगरसेविका एकताबी लतीफ शेख यांच्या वतीने त्यांच्या पती लतीफ शेख यांनी महाराष्ट्र राज्याचे उपमुख्यमंत्री एकनाथ शिंदे यांच्या कार्यप्रणालीवर विश्वास ठेवत आणि आमदार चंद्रकांत पाटील यांच्या नेतृत्वाखाली मुंबई येथे उपमुख्यमंत्री एकनाथ शिंदे यांच्या उपस्थितीत भाजपमध्ये अधिकृत प्रवेश केला.

या पक्षांतरामुळे राष्ट्रवादी काँग्रेस (शरद पवार गट) ला मोठा धक्का बसला आहे. आ. एकनाथ खडसे यांच्या विश्वासू सहकाऱ्यांपैकी काही नगरसेवकांनी शिवसेनेत व भाजपमध्ये प्रवेश घेतल्याने स्थानिक राजकारणाचे समीकरण पूर्णतः बदलले आहे.

विशेष म्हणजे 13 मार्च रोजी आ. एकनाथ खडसे बोदवड दौऱ्यावर असताना, त्याच वेळी नगरसेवकांचा भाजप व शिवसेनेत प्रवेश झाल्याने राजकीय वातावरण अधिक तापले आहे.

या प्रवेश सोहळ्याला नगराध्यक्ष आनंदा पाटील, उपनगराध्यक्ष संजय गायकवाड, नगरसेवक दिनेश माळी, सुनिल बोरसे, निलेश माळी, प्रितेश जैन, हर्षल बडगुजर, तसेच शिवसैनिक अमोल व्यवहारे यांच्यासह अनेक कार्यकर्ते उपस्थित होते.

यानंतर, 14 मार्च रोजी जामनेर येथे जलसंपदामंत्री गिरीश महाजन यांच्या हस्ते आणि भाजप अध्यक्ष मधुकर राणे यांच्या प्रमुख उपस्थितीत, बोदवड येथील नगरसेवक कडूसिंग उर्फ भरत पाटील, सौ. योगिता खेवलकर, सौ. पूजा पारधी, माजी स्वीकृत नगरसेवक डॉ. सुधीर पाटील, काँग्रेस महिला तालुका अध्यक्ष उषाताई पाटील आणि इतर पदाधिकाऱ्यांनी भाजपमध्ये प्रवेश केला.

या कार्यक्रमास जिल्हा चिटणीस परमेश्वर टिकारे, तालुका उपाध्यक्ष विक्रम पाटील, शहर अध्यक्ष पवन जैन आणि तालुका सरचिटणीस पंकज डिके यांची उपस्थिती होती. या घडामोडींमुळे बोदवडच्या राजकारणात मोठे परिवर्तन घडले असून, आगामी स्थानिक निवडणुकांवर त्याचा मोठा परिणाम होण्याची शक्यता आहे.