भडगाव लोकन्यायालयात १८ प्रकरणे निकाली

भडगाव लोकन्यायालयात १८ प्रकरणे निकाली

सामोपचारातून १० लाखांहून अधिक रकमेची तडजोड

भडगाव : विधी सेवा समिती भडगाव व तालुका वकील संघ भडगाव यांच्या संयुक्त विद्यमाने भडगाव न्यायालयात दि. १४ मार्च २०२६ रोजी राष्ट्रीय लोकन्यायालयाचे आयोजन करण्यात आले होते. या लोकन्यायालयात प्रलंबित तसेच वादपूर्व प्रकरणांचा समावेश करून एकूण १८ प्रकरणे सामोपचाराने निकाली काढण्यात आली.
या लोकन्यायालयात संबंधित पक्षकारांमध्ये परस्पर तडजोड घडवून आणत एकूण १० लाख २८ हजार १७२ रुपयांची रक्कम निश्चित करण्यात आली. त्यामुळे अनेक प्रकरणांतील दीर्घकालीन वाद मिटून संबंधित पक्षकारांना जलद न्याय मिळाला.
या लोकन्यायालयाचे कामकाज भडगाव न्यायालयाच्या न्यायाधीश प्रावी राजळे यांच्या मार्गदर्शनाखाली पार पडले. तसेच पॅनल अॅडव्होकेट म्हणून अॅड. उमेश महाजन यांनी सुनावणी व तडजोड प्रक्रियेत महत्त्वाची भूमिका बजावली.
लोकन्यायालय यशस्वी करण्यासाठी भडगाव वकील संघाचे अध्यक्ष अॅड. बी. आर. पाटील, उपाध्यक्ष अॅड. गणेश वेलसे, सचिव अॅड. प्रकाश सोनवणे तसेच वकील संघातील सदस्यांनी सक्रिय सहकार्य केले. याशिवाय विधी सेवा समिती भडगाव येथील न्यायालयीन कर्मचाऱ्यांनीही आवश्यक ती मदत केली.
या लोकन्यायालयामुळे अनेक प्रकरणे अल्पावधीत निकाली निघाल्याने नागरिकांना मोठा दिलासा मिळाला असून न्यायव्यवस्थेवरील विश्वास अधिक दृढ झाल्याची भावना उपस्थितांकडून व्यक्त करण्यात आली.