भरधाव वाळू डंपरची धडक; वृद्धाचा जागीच मृत्यू, ग्रामस्थांचा संताप उसळला

भरधाव वाळू डंपरची धडक; वृद्धाचा जागीच मृत्यू, ग्रामस्थांचा संताप उसळला

चालक व मालक अटकेत; एक दिवसाची पोलिस कोठडी

जळगाव : भरधाव वेगाने धावणाऱ्या वाळू वाहतूक करणाऱ्या डंपरने जोरदार धडक दिल्याने एका ७५ वर्षीय वृद्धाचा जागीच मृत्यू झाल्याची दुर्दैवी घटना जळगाव तालुक्यातील वराड येथे २८ मार्च रोजी रात्री आठ वाजेच्या सुमारास घडली.

या घटनेनंतर ग्रामस्थांनी तीव्र संताप व्यक्त करत वाळू वाहतुकीविरुद्ध आक्रमक भूमिका घेतली.
अपघातात मृत्यू झालेल्या वृद्धाचे नाव बशीरशा मकबूलशा शाह फकीर (वय ७५, रा. वराड) असे आहे. ते कामानिमित्त गावातील बसस्थानकाकडे जात असताना (एमएच ४७, एएस ५१४८) क्रमांकाच्या डंपरने त्यांना जोरदार धडक दिली. धडकेनंतर ते डंपरखाली सापडून गंभीर जखमी झाले. त्यांना तत्काळ शासकीय रुग्णालयात दाखल करण्यात आले; मात्र डॉक्टरांनी त्यांना मृत घोषित केले.

घटनेची माहिती मिळताच एमआयडीसी पोलिस ठाण्याचे पथक घटनास्थळी दाखल झाले. पोलिसांनी संबंधित डंपर ताब्यात घेतला असून चालक नितीन वसंत मिस्तरी (रा. दोपोरे, ता. एरंडोल) व मालक भूषण सुधाकर चव्हाण (रा. धानोरा, ता. जळगाव) यांच्याविरुद्ध गुन्हा दाखल करून त्यांना अटक करण्यात आली आहे. न्यायालयात हजर केल्यानंतर दोघांनाही एक दिवसाची पोलिस कोठडी सुनावण्यात आली असून पुढील तपास सहायक पोलिस निरीक्षकांकडून सुरू आहे.

अपघातानंतर गावकऱ्यांनी मोठ्या प्रमाणात संताप व्यक्त करत भरधाव डंपर वाहतुकीवर तातडीने नियंत्रण आणण्याची मागणी केली. काही काळ वातावरण तणावपूर्ण झाले होते; मात्र पोलिसांनी परिस्थिती नियंत्रणात आणत कारवाईची ग्वाही दिल्यानंतर ग्रामस्थांनी मार्ग मोकळा केला.