भांडण पाहणे पडले महाग; तरुणाला बेदम मारहाण

भांडण पाहणे पडले महाग; तरुणाला बेदम मारहाण

मेहरुण परिसरात प्रकार; लोखंडी कड्याने हल्ला, दोघांविरुद्ध नोंद

जळगाव : प्रतिनिधी
रस्त्यावर सुरू असलेले भांडण पाहण्यासाठी थांबलेल्या तरुणाला मारहाण केल्याची घटना मेहरुण परिसरात घडली. या मारहाणीत तरुण जखमी झाला असून, या प्रकरणी दोघांविरुद्ध अदखलपात्र गुन्ह्याची नोंद करण्यात आली आहे.
भांडण पाहिल्याचा राग अनावर
वसीम शेख शब्बीर शेख (वय ३७, रा. बिलाल चौक, तांबापुरा) हे दि. २२ मार्च रोजी मेहरुण परिसरातील घरकुल घरांसमोरून जात असताना रस्त्यात प्रकाश उर्फ दादू कालपे आणि धनराज हटकर यांच्यात वाद सुरू होता. हा वाद पाहत उभे राहिल्याने दोघांना संताप आला.
चापटा-बुक्क्यांसह कड्याने हल्ला
रागाच्या भरात दोघांनी वसीम शेख यांना शिवीगाळ करत चापटा-बुक्क्यांनी मारहाण केली. यावेळी धनराज हटकर याने हातातील लोखंडी कड्याने वसीम शेख यांच्या गालावर प्रहार केला, ज्यामुळे ते जखमी झाले.
एमआयडीसी पोलिसात नोंद
या घटनेप्रकरणी एमआयडीसी पोलिस ठाण्यात प्रकाश कालपे व धनराज हटकर यांच्याविरुद्ध अदखलपात्र गुन्ह्याची नोंद करण्यात आली असून, पुढील कारवाई सुरू आहे.