भाडेकरूच निघाला चोर; मशिनरी चोरीप्रकरणी दोघे गजाआड

भाडेकरूच निघाला चोर; मशिनरी चोरीप्रकरणी दोघे गजाआड

पाच तासांत शहर पोलिसांची कारवाई; एक आरोपी फरार

जळगाव : घरमालकाच्या घरातून मशिनरी व चिलर मशीन चोरणाऱ्या भाडेकरूसह त्याच्या साथीदाराला शहर पोलिसांनी अवघ्या पाच तासांत अटक केली. या प्रकरणात एक आरोपी अद्याप फरार असून अटकेतील दोघांना न्यायालयाने दोन दिवसांची पोलीस कोठडी सुनावली आहे.

राजमालतीनगर परिसरातील संजू बिसमिल्ला पटेल (वय ४९) यांनी आपल्या घरातील एक खोली नासिर निसार शेख (रा. राजमालतीनगर) याला भाडेतत्त्वावर दिली होती. दि. १ एप्रिल रोजी सायंकाळी पटेल हे भाडे घेण्यासाठी गेले असता संबंधित खोलीला कुलूप होते, तर शेजारील खोलीचा दरवाजा उघडा दिसला. आत पाहणी केली असता तेथे ठेवलेली मशिनरी व साहित्य गायब असल्याचे लक्षात आले.

चौकशीदरम्यान नासिर शेख याने परिसरातील नागरिकांना घरमालकानेच मशिनरी विकल्याचे व ती गहाण ठेवल्याचे खोटे सांगितल्याचे उघड झाले. प्रत्यक्षात आरोपींनी ३२ हजार रुपये किमतीची चिलर मशीन व ५ मोटारी (सुमारे ३० हजार रुपये) असा एकूण ६२ हजार रुपयांचा ऐवज चोरून नेला होता.

याबाबत ७ एप्रिल रोजी शहर पोलिस ठाण्यात गुन्हा दाखल होताच गुन्हे शोध पथकाने तातडीने तपास सुरू केला. तांत्रिक विश्लेषणाच्या आधारे पोलिसांनी नासिर शेख याला पाळधी येथून तर कार्तीक संजय मोरे (रा. नवीपेठ) याला त्याच्या राहत्या घरातून ताब्यात घेतले. त्यांच्या ताब्यातून चोरीस गेलेली चिलर मशीन व दोन मोटारी जप्त करण्यात आल्या आहेत.
ही कारवाई पोलीस निरीक्षक सागर शिंपी यांच्या मार्गदर्शनाखाली गुन्हे शोध पथकाने केली. पुढील तपास सुरू असून तिसऱ्या फरार आरोपीचा शोध घेतला जात आहे.