भारतीय ज्ञान परंपरेचा अभिमान बाळगणे गरजेचे – प्रा. जगदीश पाटील

भारतीय ज्ञान परंपरेचा अभिमान बाळगणे गरजेचे – प्रा. जगदीश पाटील

भारतीय ज्ञान परंपरा व जागतिक प्रभाव या विषयावरील राष्ट्रीय परिषदेचा समारोप

जळगाव, प्रतिनिधी) – भारतीय ज्ञान परंपरेतील ज्ञान आणि मूल्ये प्रत्येक शतकात त्या काळातील परिस्थितीनुसार मार्गदर्शन करणारी ठरली असून भारतीयांनी या परंपरेचा अभिमान बाळगला पाहिजे, असे प्रतिपादन कला व मानव्यविद्या विद्याशाखेचे अधिष्ठाता प्रा. जगदीश पाटील यांनी केले.
कवयित्री बहिणाबाई चौधरी उत्तर महाराष्ट्र विद्यापीठात ‘भारतीय ज्ञान परंपरा आणि जागतिक प्रभाव’ या विषयावर आयोजित राष्ट्रीय परिषदेचा समारोप नुकताच पार पडला. या समारोप कार्यक्रमाला पीएम-उषा समन्वयक प्रा. आशुतोष पाटील, कला व मानव्यविद्या प्रशाळेचे संचालक प्रा. राम भावसार, परिषदेचे सचिव डॉ. तुषार रायसिंग आणि परिषदेच्या समन्वयक डॉ. वीणा महाजन यांची उपस्थिती होती.
यावेळी प्रा. आशुतोष पाटील यांनी मनोगत व्यक्त करताना विद्यार्थ्यांमध्ये भारतीय ज्ञान परंपरेबद्दलची रुची वाढविण्यासाठी आयकेएस (इंडियन नॉलेज सिस्टिम) चा प्रभावी वापर करता येईल, असे मत व्यक्त केले. संचालक प्रा. राम भावसार यांनी दोन दिवसीय राष्ट्रीय परिषदेचा आढावा घेतला. केतन वाघ यांनी प्रतिनिधी म्हणून मनोगत व्यक्त केले. कार्यक्रमाचे सूत्रसंचालन दीपाली माळी आणि इशिका गुप्ता यांनी केले, तर आभार प्रदर्शन डॉ. तुषार रायसिंग यांनी मानले.
परिषदेच्या दुसऱ्या दिवसाच्या पहिल्या सत्रात संस्कृत अकादमी, हैदराबादचे संचालक डॉ. मधुसूदन पेन्ना यांनी ‘भारतीय तत्त्वज्ञानाची आंतरराष्ट्रीय प्रासंगिकता’ या विषयावर ऑनलाइन मार्गदर्शन केले. भारतीय ज्ञान परंपरेत प्राचीन काळापासून भाषेचा सखोल अभ्यास झालेला असून अशी परंपरा जगातील इतर देशांमध्ये क्वचितच आढळते. आजही अनेक देशांमध्ये भारतीय तत्त्वज्ञानाचा अभ्यास केला जातो, असे त्यांनी नमूद केले.
दुसऱ्या सत्रात जगदंब महाविद्यालय, अचलपूर येथील वाणिज्यशास्त्राचे प्रा. मयुरेश शिंगरूप यांनी ‘भारतीय ज्ञान प्रणालीचा आढावा आणि जागतिक संदर्भात कौटिल्य अर्थशास्त्राची प्रासंगिकता’ या विषयावर मार्गदर्शन केले. भारतीय ज्ञान परंपरा ही प्राचीन ग्रंथसंपदेवर उभी असल्यामुळेच आपल्या संस्कृतीची खरी ओळख मिळते, असे ते म्हणाले. या सत्रात सहभागी संशोधकांनी आपापले शोधनिबंध सादर केले.