भारूडखेडे शिवारात शॉर्ट सर्किटमुळे भीषण

भारूडखेडे शिवारात शॉर्ट सर्किटमुळे भीषण आग; शेतकऱ्याचे ३५ हजारांचे नुकसान
पहूर (प्रतिनिधी) : जामनेर तालुक्यातील भारूडखेडे शिवारात महावितरणच्या विद्युत तारा अचानक शॉर्ट सर्किट झाल्याने भीषण आग लागली. या आगीत एका शेतकऱ्याचे शेती साहित्य जळून सुमारे ३५ हजार रुपयांचे नुकसान झाले आहे.

या प्रकरणी पहूर पोलीस ठाण्यात अकस्मात आगीची नोंद करण्यात आली आहे.
भारूडखेडे येथील विलास अर्जुन रायपुरे (वय ५३) यांची गट क्रमांक ८० मध्ये शेतजमीन आहे. रविवारी (दि. १२) सकाळी सुमारे १० वाजता त्यांच्या शेतातून जाणाऱ्या महावितरणच्या वीजतारांमध्ये अचानक शॉर्ट सर्किट झाले. त्यामुळे ठिणग्या पडून शेतात आग भडकली.
या आगीत शेतकऱ्याचे शेतीसाठी ठेवलेले साहित्य पूर्णपणे जळून खाक झाले. यात सुमारे २० हजार रुपयांचे नोबेल कंपनीचे २१ ठिबक सिंचन बंडल, १० हजार रुपयांचे २१ पीव्हीसी पाईप, तसेच ५ हजार रुपयांची विहिरीतील केबल वायर आणि स्टार्टर पेटी यांचा समावेश आहे. एकूण सुमारे ३५ हजार रुपयांचे नुकसान झाल्याचे स्पष्ट झाले आहे.

या घटनेची नोंद पहूर पोलीस ठाण्यात अकस्मात आग नोंद क्रमांक ०४/२०२६ प्रमाणे करण्यात आली आहे. पुढील तपास पोलीस हेड कॉन्स्टेबल सचिन चौधरी करत आहेत.
उन्हाळ्याच्या वाढत्या तीव्रतेमुळे शॉर्ट सर्किटच्या घटनांमध्ये वाढ होत असून, महावितरणने ढिल्या व जीर्ण झालेल्या वीजतारांची तातडीने दुरुस्ती करावी, अशी मागणी शेतकऱ्यांकडून करण्यात येत आहे.