भुसावळमध्ये गृहिणीची गळफास घेऊन आत्महत्या

भुसावळमध्ये गृहिणीची गळफास घेऊन आत्महत्या

मोरेश्वर नगरातील घटना

भुसावळ | प्रतिनिधी : भुसावळ तालुक्यातील मोरेश्वर नगर परिसरात गुरुवारी दुपारी साडेदोनच्या सुमारास ३५ वर्षीय विवाहित महिलेने गळफास घेऊन आत्महत्या केल्याची धक्कादायक घटना उघडकीस आली. दर्शना उर्फ भारती दिपक तायडे असे मयत महिलेचे नाव असून या घटनेमुळे परिसरात शोककळा पसरली आहे.

प्राथमिक माहितीनुसार, संबंधित महिलेचे पती रेल्वे सुरक्षा दलात (आरपीएफ) कार्यरत आहेत. घरातील बेडरूममध्ये छताच्या पंख्याला साडीच्या सहाय्याने गळफास घेतल्याचे प्रथमदर्शनी तपासात आढळून आले. ही बाब शेजाऱ्यांच्या निदर्शनास आल्यानंतर त्यांनी तातडीने पोलिसांना कळविले. त्यानुसार भुसावळ शहर पोलीस ठाणे येथे घटनेची नोंद करण्यात आली.

पोलीस निरीक्षक उध्दव डमाडे यांच्या मार्गदर्शनाखाली सहायक पोलीस निरीक्षक राहुल भंडारे पुढील तपास करत आहेत. घटनास्थळी पंचनामा करण्यात आला असून मृतदेह ताब्यात घेऊन शवविच्छेदनासाठी पाठविण्यात आला आहे. आत्महत्येमागील नेमके कारण अद्याप स्पष्ट झाले नसून पोलिसांकडून कुटुंबीयांची चौकशी सुरू आहे. या घटनेमुळे मोरेश्वर नगर परिसरात शोक व तणावाचे वातावरण निर्माण झाले आहे.