भुसावळमध्ये बालवाडीजवळ बसण्यावरून युवकाला बेदम मारहाण; कुटुंबीयांवरही घरात घुसून हल्ला

भुसावळमध्ये बालवाडीजवळ बसण्यावरून युवकाला बेदम मारहाण; कुटुंबीयांवरही घरात घुसून हल्ला

भुसावळ (प्रतिनिधी)
पालिका बालवाडीसमोर बसल्याच्या कारणावरून युवकाला जबर मारहाण करण्यात आली. यानंतर हल्लेखोरांनी त्याच्या घरात घुसून कुटुंबीयांवरही हल्ला करत गंभीर जखमी केले. या प्रकरणी सहा जणांविरोधात बाजारपेठ पोलीस ठाण्यात गुन्हा दाखल करण्यात आला आहे.

गुलाम मोहम्मद शेख बिस्मिल्ला (वय २७, रा. आगाखान वाडा, शिवाजीनगर) हे ११ जून रोजी रात्री ९.३० वाजता पालिकेच्या बालवाडीसमोर बसले होते. यावेळी अहमद इब्राहीम कुरेशी, सुलताना बी अहमद कुरेशी व साहील मुशीर शेख या तिघांनी तेथे येत “येथे का बसलात? ही बालवाडी तुमच्या बापाची आहे का?” अशा शब्दांत वाद घातला. त्या वादाचे रूपांतर शिवीगाळ आणि मारहाणीत झाले.

मारहाणीच्या घटनेनंतर पीडित युवक घरी गेला असता, रात्री १०.१५ वाजता वरील आरोपींसोबत गुड्डी शेख मुशीर, नसिम शेख सलीम आणि शमा बी हफीज हेही त्यांच्या घरात घुसले. त्यांनी गुलाम दस्तगीर शेख रोशन यांच्यावर लोखंडी सळईने हल्ला केला व “तुझा पुतण्या जिथे मिळेल तिथे त्याला ठार करू” अशी धमकी दिली.

या हल्ल्यात जखमी झालेल्यांना तातडीने ट्रामा केअर रुग्णालयात उपचारासाठी दाखल करण्यात आले आहे. या प्रकरणी १३ जून रोजी बाजारपेठ पोलीस ठाण्यात गुन्हा दाखल करण्यात आला असून, पोलीस नाईक जुगार तडवी पुढील तपास करीत आहेत.