भुसावळमध्ये महसूल सप्ताहात छत्रपती शिवाजी महाराज समाधान शिबिर उत्साहात पार

भुसावळमध्ये महसूल सप्ताहात छत्रपती शिवाजी महाराज समाधान शिबिर उत्साहात पार

भुसावळ, – महसूल सप्ताह २०२४ निमित्त भुसावळ महसूल मंडळ अंतर्गत उपविभागीय अधिकारी कार्यालयात छत्रपती शिवाजी महाराज समाधान शिबिर मोठ्या उत्साहात संपन्न झाले. या शिबिराचे उद्घाटन महाराष्ट्र राज्याचे वस्त्रोद्योग मंत्री मा. ना. संजय सावकारे यांच्या प्रमुख उपस्थितीत करण्यात आले.

शिबिरात नागरिकांच्या अडचणी समजून घेऊन त्यावर तात्काळ उपाययोजना करण्यात आल्या. मंत्री सावकारे यांनी यावेळी मार्गदर्शन करताना, “नागरिकांच्या समस्या सोडवण्यासाठी वेळोवेळी असे शिबिरे आयोजित करावेत,” असे स्पष्ट निर्देश दिले. तसेच, ७/१२ उताऱ्याच्या संगणकीकरण प्रक्रियेत झालेल्या त्रुटी तत्काळ दूर करण्याचे आदेशही त्यांनी दिले.

या शिबिरात महसूल विभागासह इतर शासकीय विभागांचे स्टॉल्स उभारण्यात आले होते. विविध योजनांचा लाभ मिळवण्यासाठी आलेल्या लाभार्थ्यांना प्रमाणपत्रे आणि दाखले मंत्री महोदयांच्या हस्ते प्रदान करण्यात आले.

कार्यक्रमास उपविभागीय अधिकारी जितेंद्र पाटील, तहसीलदार सौ. नीता लबडे, पोलीस निरीक्षक राहुल वाघ, नायब तहसीलदार शोभा घुले, प्रीती लुटे, जितेंद्र पाडवी, मंडळ अधिकारी प्रफुल्ल कांबळे, तलाठी मंगेश पारिसे, तेजस पाटील, बाळासाहेब गायकवाड, सोनाली कोळी, कोतवाल रवींद्र धांडे, जितेश चौधरी, सुपडू मोरे आदींसह नागरिक आणि लाभार्थी मोठ्या संख्येने उपस्थित होते.