भुसावळात भामट्यांनी २५ लाख ४२ हजारांची रोकड हिसकावली

भुसावळात भामट्यांनी २५ लाख ४२ हजारांची रोकड हिसकावली

भुसावळ प्रतिनिधी – शहरातील सत्यसाई नगर परिसरात मंगळवारी (दि. २८ ऑक्टोबर) रात्री साडेदहाच्या सुमारास तीन अनोळखी इसमांनी मोटारसायकलस्वारावर अचानक हल्ला करून तब्बल २५ लाख ४२ हजार रुपयांची रोकड असलेली थैली बळजबरीने हिसकावल्याची धक्कादायक घटना घडली असून, या प्रकारामुळे शहरात एकच खळबळ उडाली आहे.

मिळालेल्या माहितीनुसार, फिर्यादी मोहम्मद यासीन मोहम्मद इस्माईल (वय ३९, रा. सत्यसाई नगर, खडका रोड, भुसावळ) हे आपल्या मोटारसायकलवरून (क्रमांक MH 19 BC 5586) रात्री घराकडे परतत असताना सत्यसाई नगर येथील कॉम्प्लेक्सजवळील रस्त्यावर तिघा अनोळखी इसमांनी त्यांच्या दुचाकीला मुद्दाम धडक दिली. धडकेमुळे यासीन यांची निळ्या रंगाची चेन असलेली चौकोनी थैली खाली पडली. त्याच क्षणी आरोपींनी थैली बळजबरीने उचलून घेतली आणि अंधाराच्या दिशेने पसार झाले.

सदर थैलीत ५०० रुपयांच्या नोटांमध्ये २५ लाख रुपये तसेच ऑफिससाठी असलेले अतिरिक्त ४२ हजार रुपये अशी एकूण २५ लाख ४२ हजारांची रोकड होती. घटनेनंतर काही वेळातच भुसावळ तालुका पोलिसांनी परिसरात नाकेबंदी करून शोधमोहीम सुरू केली. मात्र आरोपी रात्रीच्या आडोशात पसार झाले.

या प्रकरणी भुसावळ तालुका पोलिस ठाण्यात गुन्हा क्रमांक ०२०७/२०२५ असा दाखल करण्यात आला असून, तो भारतीय न्याय संहिता (BNS) कलम ३०९(४) आणि ३(५) अंतर्गत नोंदविण्यात आला आहे. तपासाची सूत्रे पोलिस निरीक्षक महेश गायकवाड यांच्या हाती असून, पोलिसांकडून सीसीटीव्ही फुटेज, साक्षीदारांचे जबाब आणि पुरावे तपासले जात आहेत.

दरम्यान, पोलिसांनी नागरिकांना रात्रीच्या वेळी मोठ्या रकमेची वाहतूक करताना विशेष काळजी घ्यावी, तसेच परिसरात संशयास्पद हालचाली दिसल्यास तात्काळ १०० क्रमांकावर संपर्क साधावा, असे आवाहन केले आहे.