भुसावळात सौरऊर्जा ग्राहकांना वीज मंडळाचा धक्का

भुसावळात सौरऊर्जा ग्राहकांना वीज मंडळाचा धक्का

निर्माण झालेल्या विजेचे पैसे नाही; उलट हजारो रुपयांच्या बिलांचा भुर्दंड

भुसावळ : प्रतिनिधी
भुसावळ शहरात सौरऊर्जा प्रकल्प बसवलेल्या ग्राहकांना वीज वितरण मंडळाच्या तांत्रिक त्रुटीचा मोठा फटका बसत असून अनेकांना चुकीची हजारो रुपयांची वीजबिले मिळत असल्याची बाब समोर आली आहे. पंतप्रधान सूर्यघर योजनेअंतर्गत घरांवर सौरऊर्जा प्रकल्प बसवलेल्या नागरिकांना विजेचे उत्पादन दाखवले जात नसल्यामुळे निर्माण झालेलेल्या विजेचे पैसे मिळत नाहीत, तर उलट वापर दाखवून मोठ्या रकमेची बिले पाठवली जात आहेत. त्यामुळे शहरातील शेकडो सौरऊर्जा ग्राहक आर्थिक अडचणीत सापडले आहेत.

सौरऊर्जा प्रणालीतील ‘नेट मीटरिंग’ पद्धतीनुसार घरावर तयार होणारी वीज आणि वापरलेली वीज याची मोजणी केली जाते. मात्र सध्या प्रणालीतील त्रुटीमुळे सौरऊर्जेतून तयार होणारी वीज शून्य दाखवली जात असून फक्त वापरलेली वीज नोंदवली जात आहे. त्यामुळे अनेक ग्राहकांना शून्य बिल येण्याऐवजी हजारो रुपयांची बिले मिळत आहेत. गेल्या काही महिन्यांपासून हा प्रकार सुरू असून अनेक ग्राहकांना थकबाकीदार ठरवून वीजपुरवठा खंडित करण्याच्या नोटिसाही देण्यात आल्याचे समोर आले आहे.
वीजबिलाचा खर्च कमी व्हावा आणि अतिरिक्त वीज विक्रीतून काही आर्थिक फायदा व्हावा या अपेक्षेने नागरिकांनी लाखो रुपये खर्च करून सौरऊर्जा प्रकल्प बसवले. शासनानेही अनुदान देऊन या योजनेला प्रोत्साहन दिले. मात्र वीज निर्मितीची नोंद होत नसल्याने ग्राहकांना आर्थिक अडचणींचा सामना करावा लागत आहे. याशिवाय राज्यात अलीकडेच सौरऊर्जा क्षमतेनुसार वापराचे नवे नियम लागू करण्यात आल्यामुळेही अनेक ग्राहकांवर अतिरिक्त आर्थिक भार पडत असल्याची तक्रार करण्यात येत आहे.

दरम्यान शहरात जुने मीटर काढून स्मार्ट मीटर बसवण्याची प्रक्रिया सुरू आहे. स्मार्ट मीटर असलेल्या काही ग्राहकांचे थकबाकी दाखवून पूर्वसूचना न देता वीजपुरवठा खंडित केला जात असल्याचा आरोपही करण्यात येत आहे. बिल दुरुस्तीची मागणी केल्यास तांत्रिक अडचणींचा दाखला देऊन प्रक्रिया लांबवली जात असल्याने ग्राहकांमध्ये संताप व्यक्त होत आहे. शहरात हजारहून अधिक ग्राहक या समस्येमुळे प्रभावित झाले असून दररोज मोठ्या प्रमाणावर तक्रारी येत आहेत.