भुसावळ विभागाचा दणका; एकाच दिवसात पावणेतीन लाखांचा दंड वसूल

भुसावळ विभागाचा दणका; एकाच दिवसात पावणेतीन लाखांचा दंड वसूल

​८ प्रमुख स्थानकांवर ‘फोर्ट्रेस’ मोहीम; विनातिकीट प्रवास करणाऱ्यांचे धाबे दणाणले

​भुसावळ: रेल्वेतील अनधिकृत आणि विनातिकीट प्रवासाला चाप लावण्यासाठी भुसावळ रेल्वे विभागाने २५ मार्च रोजी विशेष ‘फोर्ट्रेस’ तिकीट तपासणी मोहीम राबवली. या मोहिमेत नियमांचे उल्लंघन करणाऱ्या प्रवाशांकडून तब्बल २ लाख ८२ हजार ७७० रुपयांचा दंड वसूल करण्यात आला आहे.

​मोठ्या फौजेसह स्थानकांवर कारवाई
​या मोहिमेचे नियोजन अत्यंत चोख करण्यात आले होते. यात ५५ तिकीट तपासणी कर्मचारी आणि ९ रेल्वे सुरक्षा बलाचे (RPF) जवान सहभागी झाले होते. भुसावळसह जळगाव, नाशिक रोड, मनमाड, खंडवा, अकोला, बडनेरा आणि अमरावती या ८ महत्त्वाच्या स्थानकांवर एकाच वेळी ही तपासणी करण्यात आली.

​४९१ प्रवाशांवर दंडात्मक कारवाई
​तपासणीदरम्यान विनातिकीट किंवा चुकीच्या तिकीटावर प्रवास करणारी एकूण ४९१ प्रकरणे आढळली. त्यांच्याकडून दंड वसूल करण्यासोबतच, रेल्वे कायद्याच्या कलम १४५ अंतर्गत ३ प्रकरणांमध्ये २,१०० रुपयांचा अतिरिक्त दंडही आकारण्यात आला आहे.

​अनधिकृत विक्रेत्यांनाही बसला फटका
​केवळ प्रवासीच नव्हे, तर स्थानक परिसरात प्रवाशांची अडवणूक करणाऱ्या आणि अनधिकृतपणे व्यवसाय करणाऱ्या ५ विक्रेत्यांवरही या मोहिमेत कारवाई करण्यात आली आहे. त्यांच्यावर गुन्हे दाखल करण्यात आले असून रेल्वे प्रशासनाने अनधिकृत फेरीवाल्यांना कडक इशारा दिला आहे.