मध्य रेल्वेची मालवाहतुकीत विक्रमी झेप

मध्य रेल्वेची मालवाहतुकीत विक्रमी झेप

७९.३४ दशलक्ष टन लोडिंग; ८,२७९ कोटींचा महसूल, आर्थिक प्रगतीला चालना

भुसावळ (प्रतिनिधी) : मध्य रेल्वेने आर्थिक वर्ष २०२५-२६ मध्ये मालवाहतुकीत अभूतपूर्व यश संपादन करत सर्व विक्रम मोडीत काढले आहेत. या कालावधीत ७९.३४ दशलक्ष टन माल लोडिंगची नोंद झाली असून, त्यातून तब्बल ८,२७९ कोटी रुपयांचा महसूल रेल्वेच्या तिजोरीत जमा झाला आहे.

कोळसा वाहतुकीचा मोठा वाटा
वस्तूनिहाय आकडेवारीनुसार, कोळसा वाहतुकीचा सर्वाधिक ४५ टक्के वाटा असून ३३.९२ दशलक्ष टन कोळसा वाहतूक करण्यात आली. यामधूनच ३,२१९ कोटी रुपयांचे उत्पन्न मिळाले आहे. तसेच लोहखनिज वाहतुकीत गेल्या वर्षाच्या तुलनेत तब्बल १७७ टक्क्यांची वाढ नोंदवली गेली असून १०२२ रेक्सद्वारे लोडिंग करण्यात आले.

मालगाड्यांच्या संख्येत लक्षणीय वाढ
मध्य रेल्वेने कार्यक्षमतेत सुधारणा करत दीर्घ पल्ल्याच्या मालगाड्यांची संख्या मोठ्या प्रमाणात वाढवली आहे. मागील वर्षी ३१२ असलेली संख्या यंदा ७१९ पर्यंत पोहोचली असून, दररोज सरासरी ३५९ मालगाड्यांची यशस्वी देवाणघेवाण करण्यात येत आहे.

नवीन टर्मिनल्समुळे व्यापाराला चालना
व्यापारी उलाढाल वाढवण्यासाठी मध्य रेल्वेने ‘गती शक्ती’ अंतर्गत नवीन कार्गो टर्मिनल्स सुरू केले आहेत. मोसा येथील न्यू फ्युएलको, मकरधोकरा येथील दिनेश टर्मिनल तसेच लोणावळा येथील एमिरेट्स टर्मिनल्स यांचा त्यात समावेश आहे. याशिवाय, बल्लारशाह येथे ३१ जानेवारीपासून सुरू झालेल्या नवीन माल टर्मिनलमुळे स्टील आणि लोहखनिज वाहतुकीला मोठी गती मिळाली आहे.

नागपूर विभागाचा सिंहाचा वाटा
या एकूण महसुलात नागपूर विभागाने तब्बल ५४ टक्के वाटा उचलत आघाडी घेतली आहे. त्यामुळे विभागाच्या कार्यक्षमतेचीही प्रशंसा होत आहे.कांदा, अन्नधान्य, सिमेंट यांसारख्या जीवनावश्यक व औद्योगिक वस्तूंची जलद आणि किफायतशीर वाहतूक करून बाजारभाव स्थिर ठेवण्यात मध्य रेल्वेची महत्त्वपूर्ण भूमिका ठरत आहे. यामुळे देशाच्या पायाभूत विकासालाही चालना मिळत असल्याचे स्पष्ट झाले आहे.