उघड्यावर मास विक्री करणाऱ्या १२४ जणांना बजावल्या मनपाने नोटीस

उघड्यावर मास विक्री करणाऱ्या १२४ जणांना बजावल्या मनपाने नोटीस

आठवडाभरात सहा जणांवर कारवाई

जळगाव I प्रतिनिधी

महापालिकेच्यावतीने शहरातील मांस विक्री करणाऱ्यांना परवाने देणे व असलेले परवाने नूतनीकरणाचे काम सुरु आहे. शहरातील ७७ जणांनीच मांस विक्रीचा परवाना घेतल्याची नोंद महापालिकेत आहे, मात्र प्रत्यक्षात शहरात दोनशे पेक्षा जास्त जण उघड्यावर अनधिकृतपणे मांस विक्री करीत आहे. महापालिकेने अशा १२४ जणांना नोटीसा बजावल्या असून आठवडाभरात सहा जणांवर कारवाई केली आहे.

महापालिकेने उघड्यावरील अनधिकृत मांस विक्रेत्यांवर कारवाईची मोहीम मध्यंतरी राबवली होती. आरोग्य विभागाने सर्वे करून सुमारे १२४ विक्रेत्यांना नोटीसाही बजावल्या होत्या. गेल्या सहा दिवसांपासून शहराच्या विविध भागात उघड्यावरील अनधिकृत मांस विक्रेत्यांवर कारवाई करण्यात येत आहे. यात विक्रेत्याचे पिंजरे, सुरे, लाकडी पाट, तंबु यासारखे साहित्य जप्त करण्यात येत आहेत. दरम्यान,
गुजराल पेट्रोल पंप परिसरात पिंप्राळ्यात प्रवेश करतानाच रस्त्यावर मांस विक्री करणाऱ्याविषयी सातत्याने ओरड होत असताना या विक्रेत्याला महापालिकेकडून अभय दिले जात असून आतापर्यंत त्याच्यावर कारवाई झालेली नाही. हे दुकान हटविण्याची मागणी या भागातील व्यावसायिक व रहिवाशांकडून सातत्याने होत आहे.

शहरातील किरकोळ मांस विक्री करणाऱ्या व्यावसायिकांना परवाना नूतनीकरण तसेच नवीन परवान्यासाठी महापालिकेच्या आठव्या मजल्यावरील स्वच्छता विभागात कामकाज सुरु करण्यात आले आहे. उघडयावर अनधिकृत किरकोळ मांस विक्री करणाऱ्या व्यावसायिकांनी त्वरीत बंद करावे, अन्यथा महानगरपालिकेडून दंडात्मक कारवाई करण्यात येईल असा इशारा सहायक आयुक्त उदय पाटील यांनी दिला आहे