मनपाचे १४५२ कोटींचे अंदाजपत्रक सादर

मनपाचे १४५२ कोटींचे अंदाजपत्रक सादर

साडेआठ कोटींचे शिलकी बजेट; स्थायी समितीकडून अभ्यासानंतर महासभेत मंजुरी

जळगाव : प्रतिनिधी जळगाव महानगरपालिकेच्या स्थायी समितीच्या सभेत महापालिका आयुक्त ज्ञानेश्वर ढेरे यांनी मंगळवारी साडेआठ कोटी रुपयांचे शिलकीचे अंदाजपत्रक सादर केले. सन २०२६–२७ या आर्थिक वर्षासाठी १४५२ कोटी रुपयांचे मुळ अंदाजपत्रक सभेसमोर ठेवण्यात आले असून त्यावर स्थायी समितीकडून सविस्तर अभ्यास करण्यात येणार आहे. त्यानंतर हे अंदाजपत्रक महासभेसमोर मंजुरीसाठी सादर करण्यात येणार आहे.

नवीन नगरसेवकांच्या निवडीनंतर स्थायी समितीची ही पहिलीच सभा सभापती डॉ. चंद्रशेखर पाटील यांच्या अध्यक्षतेखाली पार पडली. यावेळी व्यासपीठावर महापालिका आयुक्त ज्ञानेश्वर ढेरे, अतिरिक्त आयुक्त शोभा बाविस्कर, उपायुक्त धनश्री शिंदे, उपायुक्त प्रशासन निर्मला पेखळे-गायकवाड तसेच नगरसचिव सतीश शुक्ला उपस्थित होते. सभेच्या प्रारंभी आयुक्त ढेरे यांच्या हस्ते नवनिर्वाचित सभापतींचा सत्कार करण्यात आला.

यानंतर आयुक्त ढेरे यांनी सन २०२५–२६ चे सुधारित अंदाजपत्रक तसेच सन २०२६–२७ चे मुळ अंदाजपत्रक सभापती डॉ. चंद्रशेखर पाटील यांच्याकडे सादर केले. अंदाजपत्रकातील तरतुदी, जमा-खर्च यासंदर्भात त्यांनी सभागृहात निवेदनही सादर केले. मालमत्ता करातून सन २०२५–२६ मध्ये सुमारे ११८ कोटी रुपयांचे सुधारित उत्पन्न अपेक्षित धरण्यात आले आहे. शहरातील सर्व मालमत्तांचे सर्वेक्षण पूर्ण झाले असून वार्षिक भाडेमूल्य निर्धारणाचे कामही पूर्ण झाल्याने महानगरपालिकेच्या उत्पन्नात सुमारे ५ कोटी रुपयांची वाढ होण्याची अपेक्षा व्यक्त करण्यात आली आहे.

या वाढीच्या पार्श्वभूमीवर सन २०२६–२७ या आर्थिक वर्षात मालमत्ता करातून सुमारे १२४ कोटी रुपयांचे उत्पन्न अपेक्षित धरण्यात आले आहे. तसेच अत्यंत जुनी व जीर्ण झालेली प्रभाग समिती क्रमांक ३ आणि ४ यांची कार्यालये नूतनीकरणासाठी नवीन इमारत उभारण्याचे नियोजन करण्यात आले आहे. मनपाच्या मालकीच्या गाळ्यांबाबत २ ते ३ टक्के दराने आकारणी करण्याचा प्रस्ताव शासनाच्या मंजुरीसाठी पाठविण्यात आला आहे.

मनपाच्या मालकीच्या जागांवर ९२ ठिकाणी जाहिरात बॅनर व फलकांसाठी स्ट्रक्चर उभारून जाहिराती प्रसिद्ध करण्यासाठी अभिकर्त्याची नेमणूक करण्याची निविदा प्रक्रिया सुरू असून त्यातून महानगरपालिकेला अतिरिक्त उत्पन्न मिळण्याची अपेक्षा आहे. तसेच शहरात व्यवसाय करणाऱ्या प्रत्येक व्यावसायिकाकडून लायसन्स फी आकारून व्यवसाय परवाना देण्याची कार्यवाही सुरू करण्यात आली आहे.
दरम्यान, जळगाव महानगरपालिका हद्दीतील सुमारे ३० टक्के क्षेत्रात मलनिस्सारण योजनेची कामे पूर्ण झाली असून सन २०२४ पासून ४८ दशलक्ष लिटर प्रतिदिन क्षमतेचा मलप्रक्रिया प्रकल्प कार्यान्वित करण्यात आला आहे. या योजनेअंतर्गत २०० किलोमीटर लांबीच्या मलवाहिन्या तसेच मलउपसा केंद्रांची उभारणी पूर्ण करण्यात आली आहे.

महिला व बालकल्याण विभागासाठी अंदाजपत्रकात २ कोटी ५० लाख रुपयांची तरतूद सुचविण्यात आली असून महिला, बालक तसेच दिव्यांग कल्याणाच्या योजनांसाठी आवश्यकतेनुसार मागील वर्षातील अखर्चित निधी उपलब्ध करून देण्याबाबत प्रशासन कटिबद्ध असल्याचे आयुक्तांनी स्पष्ट केले. तसेच जळगाव शहरासाठी लवकरच ई-बस सेवा सुरू करण्याचे नियोजन असून त्यासाठी शहरातील मार्ग निश्चित करण्याची प्राथमिक प्रक्रिया सुरू असल्याची माहितीही त्यांनी दिली.

या बैठकीला नितीन लढ्ढा, दीपक सूर्यवंशी, नितीन सपके, मानसी भोईटे, कल्पेश सोनवणे, सुरेश सोनवणे, वंदना इंगळे, अरविंद देशमुख, विष्णू भंगाळे, गणेश सोनवणे, सागर सोनवणे, ॲड. दिलीप पोकळे, नरेंद्र पाटील तसेच इब्राहिम पटेल आदी सदस्य उपस्थित होते.